Kryefaqja Aktualitet Të parët apo të fundit? Fëmija qëndron 9 muaj në spital, kostot...

Të parët apo të fundit? Fëmija qëndron 9 muaj në spital, kostot e familjes 30 milionë lekë

0
Shpërndaje

“Fëmijët janë të parët në politikat tona dhe nuk e kemi larguar për asnjë ditë të punës sonë këtë fokus”. Vetëm pasi takon prindër të fëmijëve të sëmurë në Shërbimin e Onko-hematologjisë në QSUT, e kupton sa ironike janë këto deklarata në rrjetet sociale të Ministrisë së Shëndetësisë dhe Mbrojtjes Sociale.

Deklaratë e MSHMS-së pesë muaj më parë në rrjetet sociale

“30 milionë lekë kanë qenë kostot e ilaçeve dhe qëndrimit tonë në Tiranë për 9 muaj që fëmija unë ishte shtruar në spital (në shërbimin e onko-hematologjisë) janë harxhuar 30 milionë lekë të vjetra për të blerë medikamente të cilat duhet t’i siguronte spitali. Në maj, fëmija bën 1 vit që është diagnostikuar me leucemi akute. Kur më thanë që duhet të fillojë kimioterapinë e pranova se nuk kisha ç’të bëja. Më thanë që disa medikamente ishin dhe disa mungonin. Por, nuk ishte asnjë medikament, i kam blerë të gjitha me lekë. Muajt e fundit erdhën 2 medikamente për terapi të cilat i kam blerë në fillim”, rrëfen nëna e njërit prej fëmijëve që po merr trajtim në shërbimin e onkohematologjisë në QSUT.

Ky realitet i trishtë është i njëjtë për shumë familje që bashkëvuajnë me fëmijën e tyre dhimbjen e një sëmundje kaq të rëndë.  “Nuk mund ta bënim vajtje ardhje dhe vendosëm të marrim një shtëpi me qera, për aq kohë sa fëmija duhet të qëndronte në spital. Fëmijës nuk i është siguruar një kemp. Gjatë qëndrimit në spital na janë kthyer vetëm 110 mijë lekë të vjetra dhe këto nga një Fondacion, një shumë krejt e pamjaftueshme krahasimisht me nevojat reale”. 

Familjarët na kanë vënë në dispozicion fatura dhe receta që dëshmojnë vërtetësinë e rrëfimit të tyre.

Ndërsa u premtua se “fëmijët do të jenë të parët” në politikat e Ministrisë së Shëndetësisë dhe Mbrojtjes Sociale, situata në terren tregon krejt të kundërtën. Fëmijët me sëmundje të rënda të gjakut kanë mbetur të fundit, pa ilaçe dhe pa asnjë mbështetje nga shteti, ndërsa sytë dhe lutjet i kanë drejtuar tek Zoti.

Por ky rast nuk është i pari që shëndeti.com.al denoncon.

MSHMS nuk i është përgjigjur asnjë kërkese zyrtare

Në shërbimin e onkohematologjisë, ku marrin shërbim fëmijët me sëmundje të rënda të gjakut, mungojnë medikamentet. Familjarët po zhyten në borxhe të mëdha, për përballimin e kostos së ilaçeve, të cilat duhet të rimbursohen nga shteti. Gazetarët në terren të shëndeti.com.al kanë raportuar mungesën e medikamenteve për këtë shërbim që në muajn shkurt, ku botoi dhe shkrimin: Fatura të larta, mungojnë medikamentet spitalore për fëmijët me kancer ( https://shendeti.com.al/fatura-te-larta-mungojne-medikamentet-spitalore-per-femijet-me-kancer/)

Menjëherë pas publikimit të shkrimit, shëndeti.com.al në bashkëpunim me shoqatën Together for life, ndërmorën një sërë hapash institucionale/zyrtare të cilat fatkeqësisht mbetën në vesh të shurdhët.

Më 11 shkurt 2021 i është dërguar kërkesë për informacion, përmes emailit zyrtar, Ministres së Shëndetësisë dhe Mbrojtjes Sociale, znj. Ogerta Manastirliu, ku i kërkohet informacion lidhur me mungesën e medikamenteve në shërbimin e onkohematologjisë.

Por, për këtë kërkesë nuk ka patur asnjë përgjigje.

Në këtë situatë, me 15 shkurt, të gjitha dokumentat e mbledhura nga terreni (receta, fatura etj.) TFL ia ka dërguar si ankesë Avokatit të Popullit, ku ka shprehur shqetësimin se pacientët në shërbimin e onkohematologjisë, po vuajnë mungesën e furnizimit me medikamente, për rrjedhojë po i blejnë ato në rrjetin e hapur farmaceutik, ku kostoja është shumë e lartë (përveçse nuk duhet të gjenden në rrjetin e hapur farmaceutik për shkak se janë medikamente spitalore).

Avokati i Popullit ka njoftuar se ka nisur punën për hetimin e rastit.

Me 18 mars 2021 shëndeti.com.al botoi një tjetër shkrim lidhur me kostot marramendëse që po harxhojnë prindërit me fëmijët e hospitalizuar në këtë shërbim ( https://shendeti.com.al/shendetesia-kushton-shtrenjte-kostot-marramendese-qe-po-harxhojne-prinderit-ne-qsut-per-trajtimin-e-femijeve-me-kancer/) por fatkeqësisht as pas atij shkrimi jo vetëm që nuk pati reagim, por as situata nuk ndryshoi.

Me 23 mars 2021 TFL ka nisur një kërkesë pranë Qendrës Spitalore Universitare “Nënë Tereza”, ku kërkon informacion lidhur me mungesën e këtyre medikamenteve, shkaqet e këtyre mungesave dhe se kur do të furnizohet shërbimi me medikamentet e nevojshme. Pasi ka kaluar të gjitha afatet ligjore për t’ju përgjigjur kësaj kërkese TFL ka nisur ankim administrativ pranë Komisionerit për të Drejtën e Informimit.

Ndërkohë, gazetarët kanë bërë përpjekje të herëpashershme për të folur personalisht me shefen e shërbimit, e cila ka refuzuar në mënyra kategorike kthimin e përgjigjes, si dhe me farmacinë e spitalit të cilët kanë pranuar vetëm komunikim shkresor.

Por, sa është kostoja për një muaj e trajtimit të një fëmije me sëmundjen e leucemisë?

Në një tabelë përmbledhëse, bazuar në rrëfimet e vetë prindërve të një prej fëmijëve që merr trajtim në shërbimin e onkohematologjisë, rezulton se kostoja i kalon 2 milion lekë në muaj.  Para të cilat dalin nga xhepat e qytetarëve dhe nuk rimbursohen kurrë. 

KOSTOJA MUJORE e familjeve shqiptare për trajtimin e fëmijëve me sëmundje të rënda në pavijonin e onko-hematologjisë

Covid-19 është shqetësimi më i madh i shëndetit publik aktualisht. E gjithë vëmendja e shtetit është përqëndruar aty duke harruar detyrimin për t’ju përgjigjur nevojave të qindra pacientëve të tjerë që vuajnë nga sëmundje të rënda./shendeti.com.al

LËR NJË MESAZH

Please enter your comment!
Please enter your name here