Mjekia kardiologe Eva Duraku, ishte e ftuar në Ballkanweb mëngjesin e sotëm ku foli mes të tjerash edhe në lidhje me ndikimin që kanë në shëndetin e zemrës stresi dhe gjendja e rënduar emocionale.
Ajo u ndal edhe tek sindroma e “zemrës së thyer” një gjendje që vjen pas një stresi akut apo madhor, siç janë për shembull rastet e ndarjes nga jeta të një njeriu të afërt.
“Stresi ndikon shumë keq në jetën e njeriut, aq më tepër nëse është akut apo madhor, siç është humbja e një njeriu të afërt. Me rritjen e adrenalinës dhe në bashkëpunim me yndyrnat e larta apo tensionin e lartë sjell probleme. Kardiomipatia e stresit, ose siç njihet ndryshe sindroma e zemrës së thyer, është dëmtim i zemrës pa pasur probleme me enët e gjakut, por me akumulimin e stresit dëmtohen muret e zemrës”, tha ajo.
Mjekja renditi dhimbjet e gjoksit, probleme me frymëmarrjen, dhe vertigo apo marrje mendsh, si shenjat paralajmëruese të sulmeve në zemër. “Sekreti i një zemre të shëndetshme, kryesori, të kujdesemi për zemrën. Kemi faktorë si gjenetika apo kalimi i moshës, nuk i kemi në dorë, por pirjen e duhanit, alkoolit etj i kemi në dorë.
Pirja e alkoolit edhe pse në sasi të vogla bëjnë shumë dëm.
Aktivitet sportiv jo shumë intensiv, aerobia për shembull është shumë e rekomandueshme”, përfundoi ajo.
