Personat që marrin ilaçe për tensionin e lartë të gjakut, si frenuesit ACE apo beta-bllokuesit, duhet të tregojnë kujdes jo vetëm me ushqimet, por edhe me pijet që konsumojnë. Disa prej tyre mund të ndikojnë në efektivitetin e trajtimit ose të shkaktojnë efekte anësore të padëshiruara. Kardiologët paralajmërojnë se këto janë gjashtë pijet për të cilat duhet të konsultoheni me mjekun.

1. Disa lëngje frutash

Një nga ndërveprimet më të njohura është ai me lëngun e grejpfrutit. Sipas kardiologes Sabrina Islam, ky lëng pengon veprimin e enzimës CYP3A4, e cila ndihmon organizmin të metabolizojë shumë ilaçe për tensionin e gjakut.

Si pasojë, nivelet e ilaçeve në gjak mund të rriten më shumë se sa duhet, duke shkaktuar episode të tensionit të ulët.

Edhe lëngje të tjera frutash, si ato të mollës apo agrumeve, mund të ndikojnë në mënyrën se si organizmi përthith dhe përpunon disa medikamente për tensionin.

2. Alkooli

Alkooli mund të forcojë efektin e disa ilaçeve për tensionin, përfshirë disa bllokues të kanaleve të kalciumit, alfa-bllokuesit dhe beta-bllokuesit, duke shkaktuar ulje të konsiderueshme të tensionit arterial.

Gjithashtu, ai mund të përkeqësojë efektet anësore si marramendja, dobësia, humbja e ndjenjave dhe ndryshimet në ritmin e zemrës.

Për më tepër, vetë alkooli mund të rrisë tensionin e gjakut, duke zbehur përfitimet e trajtimit. Ekspertët theksojnë se më shumë se dy pije alkoolike në ditë për burrat ose më shumë se një për gratë mund të kenë këtë efekt.

3. Pijet me kafeinë

Kafeina mund të zvogëlojë efektivitetin e disa ilaçeve për tensionin e gjakut. Studimet tregojnë se beta-bllokuesit dhe diuretikët mund të mos funksionojnë po aq mirë kur kombinohen me sasi të larta kafeine.

Specialistët rekomandojnë kufizimin e marrjes së kafeinës në më pak se 400 miligramë në ditë, që korrespondon afërsisht me tre filxhanë kafe.

Për krahasim, një filxhan çaj përmban rreth 35 miligramë kafeinë, ndërsa disa pije energjike mund të përmbajnë deri në 250 miligramë për porcion.

4. Çaji i jamballit

Edhe në sasi të vogla, çaji i jamballit dhe pijet që përmbajnë glicirizinë – një substancë e pranishme në rrënjën e jamballit – mund të rrisin ndjeshëm tensionin e gjakut dhe të kundërshtojnë efektin e medikamenteve.

Ekspertët shpjegojnë se glicirizina pengon një enzimë të veshkave që normalisht shndërron kortizolin aktiv në formën e tij joaktive. Si rezultat, nivelet e kortizolit rriten, duke shkaktuar mbajtje të natriumit, humbje të kaliumit, shtim të volumit të gjakut dhe rritje të tensionit arterial.

5. Çajrat bimorë dhe suplementet

Shumë produkte bimore mund të ndryshojnë mënyrën se si organizmi përpunon, përthith ose eliminon ilaçet për tensionin.

Për shembull, kantarioni (St. John’s Wort) mund të ndikojë në metabolizimin e ilaçeve në mëlçi, ndërsa xhinsengu dhe efedra mund të rrisin ritmin e zemrës dhe tensionin e gjakut.

Këto ndërveprime mund të dobësojnë efektin e medikamenteve ose të shkaktojnë efekte anësore si marramendje, ulje të nivelit të kaliumit dhe çrregullime të ritmit kardiak.

Ekspertët rekomandojnë gjithashtu shmangien e johimbinës dhe ekstrakteve të çajit jeshil në doza të larta.

6. Lëngjet e perimeve me përmbajtje të lartë kripe

Disa lëngje komerciale të perimeve përmbajnë sasi të larta natriumi, i cili mund të nxisë mbajtjen e lëngjeve në organizëm.

Kjo gjendje rrit ngarkesën mbi enët e gjakut dhe mund të çojë në rritje të tensionit arterial, duke zvogëluar efektivitetin e ilaçeve si diuretikët, frenuesit ACE dhe bllokuesit e receptorëve të angiotenzinës.

Në këto raste, pacientët mund të përjetojnë ënjtje, vlera më të larta të tensionit ose efekt më të dobët të trajtimit të përshkruar.

Konsultohuni me mjekun

Rekomandimet ndryshojnë në varësi të gjendjes shëndetësore, nivelit të tensionit të gjakut dhe llojit të ilaçit që përdorni.

Nëse nuk jeni të sigurt nëse një pije mund të ndikojë në trajtimin tuaj, këshillohuni me mjekun ose farmacistin. Specialistët theksojnë se ajo që mund të jetë e rrezikshme për një person, mund të mos paraqesë problem për një tjetër.