Përpjekja e parë për të kryer transplantin e kokës tek njeriu do të nisë këtë vit në SHBA.
Ideja u propozua për herë të parë në vitin 2013 nga Dr. Sergio Canavero. Ai dëshiron ta përdorë këtë operacion për të zgjatur jetën e njerëzve, organet e të cilëve janë prekur nga kanceri. Ai pretendon se pengesat e ndyshme do të jenë të kapërcyeshme dhe operacioni mund të jetë gati në fillim të vitit 2017.
Ai shtron pyetjen, a është e gatshme shoqëria për një kirurgji të tillë?
Përpjekja e parë për transplantin e kokës është kryer tek një qen nga kirurgu sovjetik Vladimir Demikhov në vitin 1954. Ai ka kryer edhe disa përpjekje të tjera, por qentë mbijetuan 2-6 ditë.
Ky eksperiment u pasua nga një tjetër i kryer mbi një majmun në vitin 1970. Ky eksperiment u udhëhoq nga Robert White. Majmuni nuk mund të lëvizte trupin dhe ishte në gjendje për të marrë frymë vetëm në mënyrë artificiale. Ai jetoi 9 ditë.
Canavero thotë se tani ka arritur një pikë ku me ndihmën e pajisjeve cilësore të teknologjisë ky eksperiment mund të realizohet. Në shkurt ai botoi një libër teknikash, të cilat beson se do t’i lejojnë mjekët të transplantojnë kokën në një trup të ri. Kjo përfshin ftohjen e kokës së pacientit dhe trupit të dhuruesit deri në pikën që qelizat e tyre të rrojnë pa oksigjen.
Canavero thotë se shumë njerëz janë gati të realizojnë ndërhyrjen për të pasur një trup tjetër. Megjithatë, janë të shumtë mjekët skeptikë.
Harry Goldsmith, profesor i neurokirurgjisë në Universitetin e Kalifornisë, një nga të paktët që ka kryer ndërhyrje në shtyllën kurrizore, duke i rikthyer të ecurën personave, thotë: “Nuk besoj se një gjë e tillë do të funksionojë. Ka shumë probleme me procedurën. Të përpiqesh të mbash të shëndetshëm dikë në koma për katër javë: nuk ndodh!”
