Përshtati në shqip për gazetën “Shëndet+”: Blertina Koka
Shkencëtarët kanë arritur të zbulojnë një panoramë thuajse perfekte të zhvillimeve gjenetike që shkaktojnë kancer të gjirit. Studimi, i publikuar tek revista “Nature”, është përshkruar si një moment historik që mund të ndihmojë në gjetjen e mënyrave të reja për trajtimin dhe parandalimin e sëmundjes.
Ky konsiderohet edhe si studimi më i madh i llojit të vet, i cili praktikisht ka zbërthyer thuajse të gjitha mutacionet që shkaktojnë keqfunksionimin e indeve të shëndetshme të gjirit.
Qendra britanike e Kërkimeve për Kancerin bëri të ditur se, këto zbulime janë një gur i rëndësishëm themeli drejt zbulimit të kurave të reja për trajtimin e kancerit të gjirit. E për të zbuluar se çfarë e shkaktonte këtë sëmundje, shkencëtarëve dhe studiuesve u është dashur të kuptojnë se çfarë shkon keq në ADN-në e një femre, që i kthen indet e shëndetshme në qeliza kanceroze.
Për të zbuluar shkaktarët e sëmundjes, shkencëtarëve u është dashur të kuptojnë se çfarë shkon keq në ADN-ën e një femre, që i kthen indet e shëndetshme në kanceroze. Ekipi ndërkombëtar i studiuesve shqyrtoi të 3 miliardë shkronjat e kodit gjenetik të njeriut, në 560 raste të kancerit të gjirit.
Ata zbuluan 93 komplete instruksionesh apo gjenesh, të cilat nëse pësojnë mutacion mund të shkaktojnë tumorin në fjalë. Disa prej tyre ishin zbuluar edhe më parë, por shkencëtarët presin tashmë që kjo listë të jetë përfundimtarja, për të penguar kështu edhe mutacionet më të rralla.
Për profesorin Sir Mike Stratton, drejtuesi i Institutit Sanger në Kembrixh, ky studim mund të konsiderohet një moment historik në kërkimet që janë bërë deri tani për kancerin.
“Janë rreth 20 mijë gjene në gjenetikën e një njeriu. Tani ne kemi një pamje komplete të kancerit të gjirit – janë 93 nga këto gjene që, nëse pësojnë mutacion, do të konvertojnë një qelizë normale të gjirit në një qelizë kanceroze. Kjo është një pjesë e rëndësishme e informacionit.
“Ne e kemi çuar këtë listë në universitete të ndryshme, farmaci, kompani bio-teknologjike për të nisur zhvillimin e ilaçeve të reja, duke qenë se këto gjene me mutacione dhe proteinat e tyre janë objektiva për terapitë e reja,” u shpreh prof. Stratton për BBC.
Burimi: BBC / https://shendeti.com.al/
