Përshtati në shqip: Blertina Koka
Shkencëtarët amerikanë besojnë se kanë identifikuar një mutacion të ri gjenetik që mund të rrisë rrezikun për kancerin e vezores, dhe ky mund të trashëgohet nga babai tek e bija.
Mutacioni gjenetik trashëgohet nëpërmjet kromozomit X dhe është i pavarur nga gjenet e tjera të njohura për të cilat gratë mund të testohen tashmë.
Megjithatë ekspertët theksojnë se duhet të bëhen më shumë kërkime shkencore për të konfirmuar identitetin dhe funksionin e këtij gjeni.
Rezultatet e këtij studimi janë publikuar tek revista PLoS Genetics.
Rreziku familjar
Aktualisht, gratë me një histori familjare të kancerit mund të testohen për gjenin BRCA, i cili rrit rrezikun që një grua të zhvillojë kancer të gjirit dhe atë të vezores.
Angelina Jolie për shembull e ka trashëguar gjenin BRCA1 nga nëna e saj – ajo i është nënshtruar një operacioni parandalues pasi mjekët zbuluan se rreziku për zhvillimin e kancerit të gjirit ishte 87% i lartë, ndërsa ai i kancerit të vezores ishte 50%.
Megjithatë shkencëtarët besojnë se mund të ketë edhe raste të tjera, sporadike, të trashëgimit të kancerit të vezores nëpërmjet kromozomit X nga babai tek vajza.
Dr. Kevin Eng dhe kolegët e tij tek Instituti i Kancerit Roswell Park dyshojnë tek një gjen, i quajtur MAGEC3, i gjetur tek kromozomi X tek baballarët.
Shkencëtarët shpresojnë që në të ardhmen ky zbulim i ri të mund të ndihmojë gratë me një histori familjare të kancerit të vezores të kuptojnë më mirë rrezikun e zhvillimit të kësaj sëmundjeje. Kjo është sidomos e rëndësishme sepse kanceri i vezores shpesh diagnostikohet në fazat e fundit, kur është shumë i vështirë për t’u trajtuar.
Burimi: BBC / Shendeti.com.al
