Shpërthimet e fruthit në disa vende të Europës kanë ngritur alarmin edhe në Shqipëri, ku janë regjistruar 12 raste gjatë periudhës janar-mars 2025. Instituti i Shëndetit Publik raporton se shumica e të prekurve janë fëmijë nën 4 vjeç, me 75% të tyre që nuk kanë marrë të dyja dozat e vaksinës.
Fruthi përhapet shpejt në komunitetet ku nivelet e vaksinimit janë të ulëta dhe hezitimi ndaj vaksinave ka qenë në rritje vitet e fundit.
Rastet janë përqendruar kryesisht në Fier, ku një vatër infeksioni është zbuluar në një kopsht, por janë identifikuar edhe raste në Vaun e Dejës, Lezhë dhe Tiranë. Megjithëse të gjithë të prekurit janë trajtuar dhe janë në gjendje të mirë shëndetësore, mjekët paralajmërojnë për rrezikun e përhapjes së mëtejshme.
Autoritetet shëndetësore u kërkojnë kopshteve dhe shkollave të mos pranojnë fëmijë të pavaksinuar dhe u bëjnë thirrje prindërve të jenë të vëmendshëm ndaj simptomave të para, si temperatura e lartë, skuqja e syve dhe njollat e kuqe në lëkurë.
Vaksinimi mbetet mbrojtja më e sigurt, me dy doza në moshën 1 dhe 5 vjeç. Aktualisht, mbulimi vaksinal në Shqipëri është 92%, por Organizata Botërore e Shëndetësisë rekomandon një nivel prej 95% për të parandaluar shpërthimet epidemike.
Para se të zhvillohej vaksina e fruthit në fillim të viteve 1960, sëmundja vriste qindra njerëz çdo vit.
