Konsumimi i një kafeje është një rit që shumë prej nesh e përsërisin disa herë gjatë ditës. Por përveç kënaqësisë së një kafeje shoqëruar me bisedën 
e miqve, ka edhe një tjetër efekt pozitiv. Sipas studimeve të fundit, kafeja ndikon në uljen e numrit të vetëvrasjeve, pasi e redukton depresionin deri në 50 për qind.
Kafeina vepron si antidepresiv i lehtë, duke përmirësuar dukshëm humorin. Studimi është kryer nga Shkolla e Mjekësisë në Harvard. Studiuesit kanë rimarrë tre studime amerikane, për të cilat u vëzhguan një numër i madh meshkujsh dhe femrash. Nga krahasimi i të dhënave doli se rreziku i vetëvrasjes për meshkujt dhe femrat që pinin nga 2-4 kafe në ditë, ulej me 50 për qind.
Studiuesit thonë se merita është e kafeinës, e cila stimulon jo vetëm sistemin nervor qendror, por edhe vepron si një antidepresiv i lehtë, duke stimuluar prodhimin e disa neurotransmetuesve në tru, mes të cilëve serotonina, dopamina dhe noradrenalina./Gridi Shehu
