Tedi Minarolli, kirurg otorinolaringolog ishte mëngjesin e kësaj të premteje i ftuar në “Good Morning Albanians” ku foli rreth operimit të bajameve. Ai tha se një operacion i tillë mund të bëhet në çdo ditë të vitit, megjithatë sipas tij bëhet më rrallë në verë.
“Duhet theksuar se vitet e fundit është reduktuar numri i personave që heqin bajamet. Më parë për shkak të protokolleve, një person që kishte një apo dy herë infeksione të bajameve, herën e tretë shkonte në shtëpi pa bajame. Kjo edhe sepse kishte antibiotik jo me spektër të gjerë, jo kaq efektiv dhe protokollet kanë qenë ndryshe.
Doja të theksoja diçka pa kaluar te heqja e bajameve, se shikojmë kohët e fundit se edhe me antibiotikët abuzohet, një infeksion bajamesh ka klinikë shumë të thjeshtë, ka dhimbje, temperature shkon 38 e gjysmë dhe ka si pllaka të bardha. Përdorimi i antibiotikut kur nuk ka temperature duhet të jetë shumë i rezervuar”, tha mjeku.
