Kemi hyrë në stinën e pranverës, kur shumë prej nesh vuajnë nga alergjia ndaj polenit, ose ndryshe riniti alergjik. Teshtijmë, na kruhet gryka e na lotojnë sytë. Ata që vuajnë më shumë, detyrohen madje dhe të kufizojnë daljet në ajër të pastër. Studimet tregojnë se smogu nëpër qytete po shton rastet e alergjive pranverore. Ka dy herë më shumë alergjikë pranverorë nëpër qytete sesa në fshatra, kjo për shkak të 
smogut, sipas ekspertëve.
Riniti alergjik u përshkrua për herë të parë si sëmundje në fillim të revolucionit industrial nga dr. Bostock, i cili vuante vetë prej sëmundjes. Iu deshën disa vjet që të kuptonte se kishte dhe të tjerë me të njëjtat simptoma. Kjo tregon sa pak e përhapur ishte alergjia stinore para revolucionit industrial.
Në 20 vjet numri i njerëzve të sëmurë me rinit alergjik në vendet perëndimore është katërfishuar, megjithëse polenet nëpër qytete nuk janë shtuar. Bashkë me rinitin janë shtuar dhe sëmundje të tjera alergjike, si astma dhe ekzema. Smogu është sidomos i dëmshëm kur ekspozohet ndaj diellit, duke krijuar të ashtuquajturin “smog fotokimik”. Sipas shkencëtarëve, smogu e mban polenin afër tokës, duke penguar shpërhapjen e tij.
