Denisa Canameti, shendeti.com.al
“Mjaftojnë edhe pak lekë. Nuk duam shuma të mëdha. Çdo qindarkë bën punë për shpëtimin e djalit tim”. Kështu shprehet nëna e 3-vjeçarit të diagnostikuar me kancer, e cila është në kufijtë e dëshpërimit. Kurat për djalin u kanë marrë të gjithë të ardhurat që kanë dhe e vetmja gjë që u ka mbetur është të “lypin” mëshirën e kujtdo që mund të vërë dorën në zemër dhe t’i ndihmojë me sadopak në mënyrë që Dioni të mund të vazhdojë kurimin që do të sjellë shpëtimin e tij.
Dioni është 3 vjeç e gjysmë. Ai është diagnostikuar së fundmi me leucemi akute linfoblastika (LAL). Pas disa vizitave në shërbimin e pediatrisë në QSUT, familjarët janë njohur me diagnozën e rëndë. Në këtë shërbim ata gjithashtu u njohën me mundësitë e (as) pakta për trajtimin e të voglit. Në kushte të tilla, me ndihmën e disa familjarëve dhe njerëzve të tjerë të ofruar, 3-vjeçari ka mundur të shtrohet në spitalin pediatrik në Peruxha të Italisë.
Aktualisht, sapo ka filluar fazën e parë të kimioterapisë intensive që do të zgjasë nga 4-6 javë. Faza e dytë e trajtimit do të jetë 2-3 muaj, që do të jetë edhe periudha e konsolidimit të luftës kundër qelizave leucemike në gjakun e vogëlushit, për të kaluar më pas në fazën e tretë (zgjat deri në 6 muaj), që është edhe faza e rehabilitimit të fëmijës.
Siç pritet, trajtimet e kësaj sëmundjeje të rëndë janë të specializuara dhe shumë të kushtueshme.
Kostot totale (të shpërndara në të gjitha fazat e trajtimit mjekësor) parashikohet të shkojnë afërsisht deri në 100.000 euro.
Dioni është djali më i vogël i një familje në gjendje të rënduar ekonomike. Ai ka edhe një vëlla tjetër më të madh 8-vjeçar, i cili ka nevojë gjithashtu për vëmendje të veçantë për shkak se vuan nga autizmi.
Nëna e Dionit nuk punon prej 8 vitesh, pasi i përkushtohet përpjekjeve për një rritje normale të fëmijëve. Babai i Dionit të vogël aktualisht punon në një kompani private me një rrogë mujore modeste.
Familjarët kanë shpërndarë thirrjen gjithandej nëpër rrjete sociale duke kërkuar sensibilizmin e njerëzve për mbledhjen e parave. Gjithashtu, në emër të djaloshit është hapur edhe një llogari bankare me shpresën që të mblidhet shuma e nevojshme.
Numri i llogarisë bankare në INTESA SANPAOLO BANK, hapur nga mamaja e Dionit:
Account: 37621537101
IBAN: AL97208111010000037621537101
Currency: LEK
