Ministria Shëndetësisë do të drejtohet nga radologia Evis Sala.
Propozimi erdhi nga kryeministri Edi Rama, gjatë njoftimit të qeverisë së re “Rama 4”.
“Shëndetësinë do ta drejtojë një studente e dikurshme e atij universiteti, e cila prej plot 29 vjetësh ka zhvilluar një karrierë ndër më mbresëlënëset në radhët shqiptare, të Europës dhe botës.
Ajo ka spikatur si akademike, si mjeke dhe si drejtuese në disa prej universiteteve dhe qendrave më të njohura spitalore në botë”, tha Rama.
Kush është Evis Sala
Evis Sala drejton Qendrën për Imazheri Diagnostike dhe Radioterapi Onkologjike në Poliklinikën “Gemelli” dhe është pedagoge në institucionet e arsimit të lartë, ku kontribuon me përvojën e saj akademike dhe kërkimore për formimin e brezit të ri të profesionistëve të shëndetit.
Prof. Sala ka një karrierë të gjatë akademike dhe kërkimore në Mbretërinë e Bashkuar, ku për shumë vite ka qenë pjesë e Universitetit të Kembrixhit dhe ka bashkëdrejtuar Programin e Avancuar të Imazhimit të Kancerit dhe Programin e Integruar të Mjekësisë së Kancerit në Qendrën e Kërkimit të Kancerit në Kembrixh.
