Ndërsa Ministria e Shëndetësisë dhe ministri Beqaj pretendon se ka siguruar të gjitha barnat e nevojshme në QSUT dhe tashmë i ka ardhur radha testimit të mjekëve, mjekë të tjerë ngrenë një tjetër problem. Si për ironi, në rrjetet sociale tashmë ngrihet një pyetje për ministrinë. Mjeku Petrit Vargu shkruan:
Le t’i bëjmë edhe ne si personel mjekësor një pyetje Ministrisë së Shëndetësisë:
Vjen një pacient me edemë pulmonare në urgjence, ku prej muajsh mungon “Lasix”. Ç’duhet të bëjë mjeku?
- Ta lërë pacientin të vdesë (larg qoftë)
- T’i thonë që të shkojë të blejë “Lasix” tek farmacitë rreth spitalit
- Ta mjekojë me _ _ _ _ _ _ që është diuretik që nuk e nxjerr pacientin nga edema pulmonare, por që jepet si diuretik alternativ nga Q.S.U. (emrin e diuretikut nuk po e shkruaj)
- Të pranojë sharjet, fyerjet dhe grushtat nga familjarët e pacientit, sepse është shkaku që po e lë të dashurin e tyre të vdesë?
Çështja e mungesës së barnave u ngrit edhe nga mjekja Anila Godo, e cila u shpreh se shpesh u duhet të përballen me të afërmit e pacientëve, pasi duke qenë se QSUT nuk i ka të gjitha ilaçet dhe shumë analiza nuk sigurohen prej tyre, janë të detyruar që t’i orientojnë pacientët drejt farmacive dhe spitaleve private, gjë e cila bie në kurriz të mjekëve./ A.Gj.
