Është shumë e lehtë të josheni kur hani jashtë, veçanërisht nëse të gjithë rreth jush zgjedhin këto mundësi jo të shëndetshme. Por ngrënia e ushqimit të shpejtë (fast-food), zgjedhja gjithmonë e ushqimeve me yndyrë të lartë apo menusë me shumë kalori, 
mund të bëjë dëm në trupin e një personi. Problemi më i dukshëm është shtimi në peshë. Për shkak se ushqimi që hamë, ndikon në mënyrën se si trupi ynë funksionon. Kështu ushqimi ndikon në:
- funksionimin mendor
- mirëqenien emocionale
- energjinë
- forcën
- peshën
- shëndetin në të ardhmen
Është më e lehtë sesa mendoni të bëni zgjedhje të mira në një restorant me ushqim të shpejtë, në një qendër apo dhe në lokal shkollor. Shumica e kafeve dhe fast-fudeve ofrojnë zgjedhje të shëndetshme që janë të shijshme, si mish pule në skarë ose sallatë. Duhet të jeni të ndërgjegjshëm mbi madhësinë e pjesëve dhe yndyrën e lartë, salcat dhe djathin.
Këtu janë disa këshilla që mund t’ju ndihmojnë kur hani jashtë:
–Kërkoni ekuilibrin. Zgjidhni ushqimet që përmbajnë proteina (si peshk, pulë, ose fasule nëse ju jeni vegjetarian), fruta dhe perime (patatet e skuqura nuk klasifikohen si perime) dhe drithëra (bukë gruri dhe oriz ngjyrë kafe). Kështu, një sanduiç gruri me pulë, me marule dhe domate është një zgjidhje më e mirë se një hamburger me djathë në një simite të bardhë.
-Zgjidhni masën. Madhësia e racioneve të ushqimeve është rritur gjatë dekadave të fundit duke bërë që të hamë më shumë seç kemi nevojë. Madhësia mesatare e një hamburgeri në 1950-n ishte vetëm 40 gramë. Të sotmit peshojnë 200 gramë apo 5 herë më shumë.
–Pini ujë ose qumësht me pak yndyrë– lëngjet e gatshme të frutave dhe pijet energjike zakonisht përmbajnë kalori “boshe” për të cilat nuk keni nevojë.
Përshtati në shqip: Elsa Musaj
