Rolina Naço, dietologe
Sa herë dështoni së mbajturi një dietë, nuk duhet të tregoheni edhe më të ashpër me trupin tuaj dhe të kaloni në një dietë edhe më drastike! Pse? Sepse e vetmja gjë që mund të përfitoni, është një metabolizëm edhe më kursimtar. Ç’do të thotë kjo?
Sa herë ne kalojmë në një dietë drastike me shumë pak kalori, trupi ynë për ekuilibër, duke qenë se e kupton se nuk do t’i ofrohet ushqim, mundohet të grumbullojë sa më shumë energji (mekanizmi i mbijetesës), të depozitojë energji për të mbijetuar. Madje edhe etja në këtë rast ka gjasa të jetë më e ulët se nevojat reale të trupit, duke u dehidratuar. Në këtë mënyrë, kthehet në një metabolizëm dembel dhe kursimtar që ju ngarkon me shumë kile dhjami, edhe pse nuk hani shumë.
Ndaj është koha t’i lini dietat. Thjesht duhet të tregoheni të duruar dhe të filloni të hani normalisht dhe të shtoni aktivitetin fizik në mënyrë që të riprogramoni trupin tuaj të djegë energjitë normalisht dhe të mos depozitojë dhjamë.
