Emanuel Smaka
Dhjetëra pacientë nga Tirana dhe rrethet janë detyruar të presin për më shumë se 2 orë mëngjesin e së enjtes në Spitalin Francez në QSUT. Përcaktimi i orareve të konsultave ka zgjatur shumë, ndërsa mjaft pacientëve u është refuzuar vizita për shkak të mungesës së dokumentacionit. Recepsionistët e spitalit i thanë Pro Pacientit se arsyet e refuzimit të konsultave ndodhin kur pacientët nuk kanë referenca nga mjeku i familjes apo mjeku specialist i rrethit kur është e nevojshme. Sa i përket fluksit, ata shtojnë se është i pashmangshëm për shkak të kërkesave të shumta për t’u trajtuar në këtë spital. Nga ana tjetër, pacientët kërkojnë shtim të punonjësve në recepsion në mënyrë që të shmangen radhët e gjata.
“Kemi 2 orë që presim. Këtu duhet të ketë më shumë njerëz që të na orientojnë se ku duhet të shkojmë dhe çfarë dokumentacioni duhet. Është e disata herë që vij dhe akoma nuk kam arritur të përcaktoj një orar vizite për problemin që kam me veshët. Do të pres sot derisa të ulet fluksi i njerëzve me shpresën se do të trajtohem. Nuk mund të kthehem sërish”, shprehet një pacient nga Vlora.
“Fluksi i lartë në Spitalin Francez në QSUT përsëritet çdo ditë dhe zgjat disa orë”, tregojnë qytetarët.
Në këtë institucion shëndetësor trajtohen sëmundjet e veshëve, hundës, fytit, stomakut, sëmundjet profesionale, alergjitë dhe shumë probleme të tjera shëndetësore. Numri i lartë i pacientëve që kërkojnë trajtim mjekësor pranë Spitalit Francez në QSUT ka bërë që pritjet të jenë të gjata. Moszbatimi i sistemit të referimit, i cili përcakton se ky spital është hallka e tretë e trajtimit, pas konsultës me mjekun e familjes dhe mjekun specialist, ka ndikuar në krijimin e një fluksi të tillë pacientësh./ ProPacientit.com
