Polikron Çelo, pediatër
Infeksionet urinare në të porsalindurit (28 ditët e para)
Disa shenja, si” mosmarrja si duhet e gjirit, zbehja, përgjumësia, të vjellat, diarreja, mosshtimi në peshë, shenjat e humbjes së lëngjeve -njollat e kuqe në 
pelena, ulja e temperaturës; duhet të ngjallin gjithmonë dyshime për një infeksion urinar; prandaj duhet kërkuar analiza e urinës dhe mbjellja e saj (urokultura). Nëse vërehen ndryshime, atëherë mjeku kërkon dhe eko, për arsye se një pjesë e mirë e këtyre infeksioneve zhvillohen në terrenin e keqformimeve të veshkave apo të rrugëve të urinës.
Infeksionet urinare në fëmijët e vegjël (deri 2 vjeç)
Në këtë moshë, në plan të parë dalin çrregullimet e aparatit tretës si mungesë e theksuar oreksi, të përziera, vjellje, diarre, episode temperature me natyrë të paqartë, grindje, përplasje këmbësh gjatë urinimit, urinë me erë të rëndë, shenja indirekte për dhimbje barku, prambetje në peshë etj. Ngritja e menjëhershme e temperaturës shpesh në këto mosha shoqërohet me konvulsione.
Infeksionet urinare në fëmijët e rritur
Mbas moshës 2 vjeç sëmundja fillon të marrë gradualisht shenjat tipike të të rriturve si urinim të shpeshtë, djegie gjatë urinimit, dhimbje në fund të barkut, rifillim i urinimit në gjumë etj. Në fëmijët e rritur, një dhimbje e fortë që i lë pa frymë vetëm për një çast, është shenjë e rëndësishme që ngjall dyshime për një infeksion të rrugëve të sipërme të urinës.
