Një tjetër mjek ka ndërruar jetë sot si pasojë e infektimit nga koronavirusi.
Behet fjalë për mjekun e njohur në Kukës, Shaqir Shehu. 68-vjeçari Shehu prej disa javësh po kurohej në Turqi, pasi kishte rezultuar pozitiv nga koronavirusi, por nuk mundi t’ia dilte.
Mjeku kuksian shërbente si kirurg ortoped në qytetin verior. Një ndihmesë tepër domethënëse dr. Shaqir Shehu ka dhënë në periudhën e rëndë sociale e humane të shkaktuar prej represionit serb në Kosovë. Dihet se dëbimi i dhunshëm i shqiptarëve nga trojet e tyre shkaktoi shumë probleme shëndetësore që duheshin përballuar. Shaqiri punoi intensivisht në dy drejtime, edhe në spital me të dëbuarit, por edhe në shërimin e ushtarëve të lirisë të plagosur në front. Ai u bë i njohur në përballimin e kësaj krize humane. Janë me dhjetëra e dhjetëra ushtarë të UÇK, të cilët morën shërbimin e duhur dhe i kuroi me shumë sukses plagët e tyre.
