Denisa Canameti, gazeta “Shëndet+”
Është përfolur shumë cilësia e ilaçeve që hyjnë në vendin tonë. Kohët e fundit kjo ka qenë edhe çështja më e diskutuar. Kolegji i Mjekëve Shqiptarë ka postuar rastin e zonjës Zana Malaj, e cila rrëfen sesi medikamentet që ka marrë në Shqipëri për hernien 
diskale, në farmacitë e Frankfurtit (Gjermani) kishin 15 vjet që ishin hequr.
“Para disa ditësh u ndodha në Frankfurt. Më kapi një krizë e hernies diskale. Djali im kërkonte në disa farmaci atje gjilpërat ampulë me të cilat kurohem në Tiranë. Nuk i njihte asnjë farmaci. Ilaçet ishin artrosilen dhe miotens. U detyrova të shtrohesha në spital, ku na thanë se ky mjekim kishte 15 vite që ishte hequr. U mjekova me tableta. Unë jam taksapaguese e rregullt. Si ka mundësi që nuk më ofrohet asnjë shërbim normal për një sëmundje kaq të thjeshtë? Në farmacitë e Tiranës më thanë se këto lloje që ke marrë ti, janë shumë të shtrenjta”, shkruan Malaj në koment-denoncimin e saj.
