Silva Bino, Shefja e Departamentit të Epidemiologjisë dhe Kontrollit të Sëmundjeve Infektive në Institutin e Shëndetit Publik, ka njoftuar gjatë një deklaratë për mediat se janë nisur drejt karantinës së Durrësit personat e parë.
Bino bën me dije se personat të cilët kanë pasur kontakte me dy të infektuarit, babë e bir, do të qëndrojnë në karantinën e Durrësit, por nuk ka dhënë shifra duke pohuar se do të ketë njoftime në vijim.
Ajo ka theksuar se personat që janë në karantinë, nuk janë të sëmurë por mbahen për sigurinë e tyre dhe komunitetit.
“Karantina është e gatshme me personelin e vet, natyrisht personat po transportohen drejt karantinës së Durrësit, sipas rastit dhe nevojës…. I kemi numrat por aktualisht jemi në proces, janë edhe 24 persona të tjerë që po u merren mostrat dhe çdo gjë po bëhet brenda 24 orëve të para”, tha Bino.
E pyetur se sa analiza për koronavirusin mund të bëhen në një ditë në laboratorin e Institutit të Shëndetit Publik, Bino u përgjigj se bëhen 200 analiza, por nëse shtohen kapacitete ky numër mund të shkojë deri në 500 analiza.
