Lëkura është organi i parë që bie në kontakt me ajrin dhe “teston” cilësitë e tij. Zhvillimi urban me të gjithë zërat e tij, ka rritur ndjeshëm sëmundshmërinë në dermatologji. Irritimet, alergjitë, infeksionet bakteriale, infeksionet mykotike, përkeqësimi i akneve në adoleshentët, janë në përqindje e shtuar falë faktorit ajër i ndotur nga gazrat dhe grimcat në ajër mbi normat e lejuara.
Edhe patologjitë kronike dermatologjike si ekzema, psoriazisi, patologjitë autoimune etj, përkeqësohen sidomos në pjesët e zbuluara. Ky konstatim e bën evident dëmtimin në lëkurë të ngarkesës së ajrit.
Një kostatim tjetër i thjeshtë në praktikën e përditshme me pacientë nga e gjithë Shqipëria, është numri më i vogël i sëmundshmërisë në zonat rurale, në ato më me pak popullsi ose zhvillim më të ulët industrial.
Si në rinimin, edhe në plakjen e lëkurës, ndikon fuqishëm cilësia e ajrit. Ajri i pastër dhe i pasur me oksigjen, është rini e përjetshme për qelizat dhe organizmin e njeriut. Ozoni dhe sasia e shtuar e tij, si në rastin e Tiranës, të paktën, ka fuqi oksiduese në proceset fiziologjike jetësore të qelizave në lëkurë. E thënë më thjesht, ozoni ka veprim plakës dhe shkatërrues mbi lëkurë. Në mënyrë të drejtëpërdrejtë në plakjen e saj veprojnë dhe grimcat që gjenden në ajrin e ndotur. Ato bllokojnë poret dhe pengojnë në mënyrë mekanike ushqyerjen dhe jashtëqitjet e proceseve fiziologjike shkëmbyese të saj.
E vetmja mënyrë për t’iu ruajtur ndotjes dhe pasojave të saj në lëkurë, është larja me ujë të rrjedhshëm, përdorimi i kremrave mjekues dhe mbrojtës dhe, mbi të gjitha, kontributi në uljen e kësaj ndotjeje./ Shendeti.com.al
