“BalkanWeb” zbardh detaje rrënqethëse mbi ngjarjen e rëndë, teksa thekson se foshnja ka lindur 24-javëshe në Maternitetin e Pogradecit, ndërsa në kartelë është shënuar si abort. Burime bëjnë me dije se ditën e lindjes foshnja nuk ka qarë, ndaj dhe stafi mjekësor i Pogradecit e ka konsideruar të vdekur, duke e vendosur në një kuti.
Kanë qenë familjarët e të porsalindurit, ata që kanë insistuar të shohin foshnjën e tyre dhe kur kanë hyrë te dhoma ku mbahej foshnja, e kanë dëgjuar të qajë.
Pas procedurave, foshnja është dërguar në Tiranë, por edhe pas shërbimit mjekësor, nuk ka mundur të jetojë. Siç shkruan “BalkanWeb”, babai i foshnjës ka deklaruar në polici të gjithë ngjarjen, duke pohuar se foshnja u gjet në një kuti.
Policia ka sekuestruar kartelën mjekësore dhe ka marrë deklarim të mjekes G. Shyta, e cila ka pranuar që ka qenë abort, e më pas ka ndodhur një “mrekulli”. Ndërkohë që ditën e djeshme është dërguar dosja në Prokurorinë e Pogradecit për veprime të mëtejshme.
