Prej dy ditësh familjarët e Xhuljeta Gejkës, 21-vjeçares nga fshati Mujalli i Fierit, që humbi jetën në rrethana ende të paqarta, enden dyerve të spitalit e policisë për të kërkuar drejtësi.
Ata akuzojnë mjekët për neglizhencë ndaj vajzës së re që humbi jetën me të mbërritur në spital. Pak orë pasi mjekët i kishin bërë serum, e kishin përcjellë drejt banesës duke i qetësuar se ishte prekur nga ndonjë virozë e stinës.
Pilo Gjeka, gjyshi i vajzës së re, tregon mes lotësh se vajza ka shkuar në spital me temperaturë shumë të ulët. Pasi ka bërë një serum, thotë gjyshi, është larguar për në banesë.
I ati i vajzës gjithashtu tregon se doktoresha, emrin e të cilët nuk e mban mend, u kishte thënë që nuk duhet të shqetësoheshin pasi ishin thjesht virozat e stinës.
“Ndërkohë që vajza rënkonte, jam e këputur, nuk kam fuqi, doktoresha thoshte nuk kam çfarë t’i bëj, janë virozat gripale. Ikni”, rrëfen ai.
“I uroj popullit shqiptar të mos kenë fatin e mbesës time veçanërisht populli i Fierit me ata mjekë që kemi. E kam çuar çupën në orën 3 në spital pasi u ftoh në trup, nga 37 i shkoi në 35 temperatura e më pas në 33,5. Ata ia matën me termometër që s’punonte, e nxorën 36, 5. Unë bërtisja doktoreshë çupa nuk është mirë, po më ftohet,
këtu gabuam ne si prindër, e nisën në shtëpi”,- thotë gjyshi i vajzës,
Nevila Shuke, drejtoresha e spitalit rajonal në Fier duke shprehur ngushëllimet për rastin deklaroi se spitali ka ngritur një grup pune në lidhje me rastin si dhe pritet dalja e autopsisë për të sqaruar këtë rast.
Burimi: BalkanWeb / Shendeti.com.al
