Të gjithë farmacistët të cilët kanë kaluar me sukses provimin e shtetit, për sezonin 2017, duhet të anëtarësohen në Urdhrin e Farmacistëve të Shtetit që të fitojnë të drejtën për të ushtruar profesionin e farmacistit.
Bazuar në nenin 6, pika 1, te ligjit Nr. 915, datë 30.10.2003 “Për Urdhrin e Farmacisteve në Republikën e Shqipërisë” asnjë individ nuk mund ta ushtrojë profesionin e farmacistit pa qenë anëtar i Urdhrit të Farmacistëve.
UFSH ka publikuar në faqen e saj zyrtare dokumentacionin që nevojitet për anëtarësim. Farmacistët duhet të paraqiten personalisht në Këshillin Rajonal përkatës me dokumentet e caktuara. Fillimisht ata duhet të plotësojnë një kërkesë për anëtarësim në Urdhrin e Farmacistëve të Shqipërisë, sipas formatit të miratuar nga Këshilli Kombëtar. Po ashtu, nevojitet fotokopja e Diplomës Universitare dhe listës së notave të noterizuara. Farmacistët të cilët janë diplomuar jashtë Shqipërisë dhe shtetasit e huaj duhet të paraqesin njësimin e diplomës së tyre në Ministrinë e Arsimit dhe Sportit.
Më poshtë do të gjeni të gjithë dokumentacionin e nevojshëm për anëtarësim në UFSH.
Për ata që nuk e ushtrojnë profesionin duhen:
- Kërkesë për anëtarësim në Urdhrin e Farmacistëve të Shqipërisë sipas formatit të miratuar nga Këshilli Kombëtar.
- Fotokopje e Diplomës Universitare dhe listës së notave të noterizuara (Farmacistët të cilët diplomohen jashtë Republikës së Shqipërisë dhe shtetasit e huaj duhet të paraqesin njësimin e diplomës së tyre në Ministrinë e Arsimit dhe Sportit, fotokopje të përkthyer dhe të noterizuar të diplomës dhe listës së notave dhe/ose fotokopje të përkthyer dhe noterizuar të vërtetimit të kryerjes së provimit të shtetit)
- Të jenë shpallur fitues në provimin e shtetit në dokumentin zyrtar të ardhur nga AKP
- Fotokopje e kartës së identitetit ose pasaportës.
- Tre fotografi 3 x 3.5 cm.
- Mandat pagesa për tarifën e regjistrimit 1500 lekë.
- Ҫertifikatë të gjendjes civile në qoftë se ka ndryshime të të dhënave personale. (ndryshim emri/mbiemri).
Dokumentacioni i nevojshëm për anëtarësim dhe leje të ushtrimit të profesionit si farmacist i punësuar.
Në rastin e aplikimit për certifikatë si i punësuar, aplikuesi përveç gjithë dokumenteve të paraqitura në pikën 1, duhet gjithashtu të sjellë:
- Fotokopje të kartës së anëtarësisë (nëse ka qenë më parë anëtar i UFSH pa ushtruar profesionin)
- Vetëdeklarim sipas formatit të miratuar nga Këshilli Kombëtar.
- Kontratë pune me punëdhënësin.
- Fotokopje e ekstraktit historik të QKR të subjektit farmaceutik të 3 muajve të fundit.
- Fotokopje e QKL.
- Fotokopje e Çertifikatës së Urdhrit të drejtuesit teknik të subjektit farmaceutik ku do të punësohet.
- Gentplan dhe planvendosje të objektit ku do të ushtrohet profesioni.
- Deklarata e pronarit të subjektit farmaceutik sipas nenit 19 të Statutit të UFSH (nëse pronari është jofarmacist).
- Mandatpagesën për lejen e ushtrimit të profesionit 5000 lekë.
