Blerina Bombaj, dietologe
Alergjitë dhe sëmundje te ndryshme i bëjnë zorrët tona delikate dhe tretja vështirësohet. Por, një shëndet i mirë fillon pikërisht nga zorrët. Disa fruta përmbajnë sheqer i cili asimilohet shumë lehtë në gjak, ndërsa disa të tjera përmbajnë formë sheqeri i cili fermentohet dhe shkakton gazra që akumulohen në zorrë.
Kjo situatë e përkeqëson gjendjen e mureve të zorrëve të cilat mund të jenë të acaruara nga situata të ndryshme shëndetësore, si alergjitë apo viruset. Raporti i fruktozës me glukozën në një frut si dhe përqendrimi i fibrave në to përcakton sasinë e asimilueshme të sheqerit. Sa më i madh raporti glukozë/fruktozë, aq më miqësore janë frutat me aparatin tretës.
Frutat më miqësore për zorrët delikate apo të acaruara
- rrushi i bardhë
- luleshtrydhet
- mjedrat
- boronicat
- ananasi
- portokalli
Frutat më të ashpra** për zorrë të irrituara (por më të mirat për kapsllëkun)
- kumbullat vishnje
- dardhët
- qershitë e ëmbla
- pjeshkat
- mollët
*Nëse vuani nga diarreja, lëngu i rrushit të bardhë është shumë i përshtatshëm pasi përmban glukozë/fruktozë në raport të barabartë. Përmbajtja e lartë e frutave në glukozë ndihmon asimilimin e tij dhe shumë pak mbetet të fermentohet. Lëngu i rrushit të bardhë përmban shumë pak sorbitol dhe kjo gjithashtu ndihmon kur zorrët janë të acaruara.
**Arsyeja përse këto fruta i quajmë më pak miqësore është për faktin se ato kanë një raport më të madh të fruktozë/glukozës, përmbajnë më shumë fibra si dhe përmbajnë më shumë sorbitol (një irritues i zorrëve). Nëse vuani nga zorrë të acaruara, këto fruta duhet t’i evitoni. Nëse vuani nga kapsllëku apo zorrë dembele, atëherë mund të përfitoni nga këto fruta.
