Agjencia Kombëtare e Mjedisit ka publikuar hartën e plazheve të bregdetit shqiptar, duke i vlerësuar ato sipas cilësisë së tyre. Nëse u referohemi hartave të projektuar nga AKM, ku cilësia e plazheve korrespondon me ngjyrat përkatëse, blu për plazhet me cilësi shumë të mirë, jeshile për plazhet me cilësi të mirë, e verdhë për ata me cilësi të mjaftueshme dhe e kuqe për plazhet me cilësi të keqe, kuptojmë që plazhet në Shqipëri tashmë vlerësohen si shumë të mira, pa përjashtuar edhe ato zona në të cilat ka ende problematika.
Në monitorimin e kryer për periudhën 15 maj – 31 maj rezulton:
- 90 stacione (91 %) – cilësi e shkëlqyer
- 6 stacione (6 %) – cilësi e mirë
- 3 stacione (3%) – cilësi e keqe
Plazhet me cilësi të keqe janë evidentuar në zonën e Durrësit (Kompleksi Xhardino), në Bregdetin e Vlorës (Shkolla e Marinës), në Bregdetin e Sarandës (Kanali i Cukës).
Sipas Agjencisë Kombëtare të Mjedisit, në segmentet veriore dhe jugore të bregdetit gjenden kryesisht plazhe të cilësisë shumë të mirë.
Në jug, kryesisht në Bregdetin e Vlorës, gjenden 4 stacione me cilësi të mirë të ujit, si: Plazhi i vjetër kamp-pioner, Plazhi i ri, Rradhim Hotel Grand, Restorant Freskia. Dy stacione të tjera me cilësi të mirë të ujit gjenden në Bregdetin Orikum, si: Kompleksi Orikum, Bar-Rest Aleksandër.
Plazhet të cilat monitorohen për herë të parë për cilësinë e tyre mikrobiologjike (dy parametrat e ndotjes Streptococcus faecalis dhe Enterococcus Intestinalis – pH dhe temperatura, si dhe inspektimi, janë monitorime që kryhen në terren gjatë fazës së kampionimit) janë:
- Plazhi i Divjakës
- Plazhi Tale
- Shëngjin
- Plazhi Spille
- Plazhi i Semanit
- Plazhi i Zvërnecit
- Plazhi i Orikumit
