Një organizatë e njohur kundër kancerit ka bërë një thirrje urgjente për kujdes ndaj ekspozimit në diell, pas një studimi shqetësues që tregoi se gjysma e qytetarëve në Mbretërinë e Bashkuar digjen nga dielli të paktën një herë në vit.
Kjo nënkupton se deri në 34 milionë persona mund të jenë duke dyfishuar rrezikun për të zhvilluar melanomën – formën më agresive dhe vdekjeprurëse të kancerit të lëkurës. Mjaftojnë vetëm pesë djegie nga dielli gjatë jetës për të rritur ndjeshëm gjasat për këtë sëmundje, e cila çdo vit i merr jetën mbi 2,000 personave në Britani.
Sipas një studimi të fundit nga organizata Melanoma Focus, grupmoshat më të reja janë më të rrezikuara – me 65% të të rinjve nga 18 deri në 32 vjeç që pësojnë djegie çdo vit.
Anketa, e cila përfshiu 2,000 persona mbi moshën 16 vjeç, zbuloi gjithashtu se mbi një në tre persona nuk përdorin rregullisht krem mbrojtës ndaj diellit gjatë ditëve të nxehta, ndërsa një në dhjetë nuk e përdor fare.
Meshkujt rezultojnë më të pakujdesshëm, me 42% të tyre që nuk përdorin aspak mbrojtje SPF.
“Nuk ia vlen për një nxirje”
Një nga rastet që sjell ndërgjegjësim është ai i Hannah Lowery, 32 vjeç, nga Redcar, Yorkshire, e cila u diagnostikua me melanomë në korrik 2024.
“Prindërit e mi ishin të kujdesshëm kur ishim jashtë shtetit dhe më kërkonin të përdorja krem mbrojtës,” – rrëfen ajo.
“Por si adoleshente nuk e përdorja në Britani dhe shpesh digjesha. Vitin e kaluar vura re që dy nishane në qafë kishin ndryshuar formë, kështu që shkova te mjeku.
Pas një dërgese urgjente, u konfirmua që kisha melanomë dhe të dy nishanet u hoqën.
Pata shumë fat që nuk ishte përhapur, por ishte një përvojë e frikshme. Isha vetëm 31 vjeçe dhe kisha një djalë 2-vjeçar. Me të vërtetë, nuk ia vlen për pak ngjyrë në lëkurë.”
Një rritje shqetësuese
Melanoma Focus e ka quajtur këtë situatë “jashtëzakonisht shqetësuese”, duke theksuar se rastet e melanomës në Britani janë në rritje të vazhdueshme.
Sot regjistrohen rreth 17,500 raste të reja çdo vit, duke e bërë melanomën kancerin e pestë më të përhapur në vend.
Susanna Daniels, drejtore ekzekutive e Melanoma Focus, deklaroi:
“Të dhënat janë alarmante. Ne e dimë që më shumë se pesë djegie nga dielli gjatë jetës dyfishojnë rrezikun për melanomë – pra djegiet e shpeshta kanë pasoja serioze afatgjata.
Është tronditëse që, edhe pse gati 90% e rasteve me melanomë janë të parandalueshme, Britania ka më shumë viktima çdo vit se Australia.
Është jetike që njerëzit të kuptojnë rreziqet dhe të mbrohen: të përdorin krem me SPF 30+, të mbajnë kapelë, të qëndrojnë në hije dhe të mbulohen gjatë orëve të pikut.”
Burimi: Daily Mail
