Ish zv-ministri i Shëndetësisë, Bardh Spahia, ka denoncuar në faqen e tij zyrtare në Facebook se vaksinat kundër gripit të shpërndara nëpër qendrat shëndetësore janë prodhim kinez dhe pa asnjë fletë udhëzuesi në shqip, siç e parashikon edhe rregullorja.
Sipas z. Spahia, vaksinimi po kryhet jashtë çdo afati, ndërkohë që cilësia dhe origjina e vaksinave është e dyshimtë.
Postimi i plotë në Facebook:
Të nderuar miq!
Kjo është vaksina antigrip e shpërndarë ditët e fundit në qendrat shëndetësore në gjithë vendin, me target grup të sëmurët kronikë dhe personat më të rrezikuar.
Siç shihet, është prodhim kinez, pa asnjë fletë udhëzues në shqip, në kundërshtim të hapur me ligjin për barnat, ku specifikohet qartë detyrimi që çdo bar që hyn në Shqipëri të ketë fletëudhëzimin në shqip.
Sikur të mos mjaftonte fakti që ky vaksinim po kryhet jashtë cdo afati, pasi periudha e duhur për vaksinimin kundër gripit është tetor-nëntor, tani pacientëve shqiptarë u duhet të përballen dhe me këtë produkt me cilësi e origjinë të dyshimtë.
Kjo është”shëndetësia falas” e Ilir Beqës dhe Edi Ramës…
