Konsumimi i tepërt i pijeve energjike mund të ketë pasoja shumë të rënda për shëndetin. Varësia ndaj pijeve energjike i ka shkaktuar një adoleshenteje probleme me zemrën. Dion Parratt, 18 vjeçe, konsumonte 5 pije energjike në ditë.
Tani ajo duhet të mbajë një monitorues zemre të lidhur me një pajisje elektrokardiogramë, në mënyrë që doktorët të monitorojnë nga afër gjendjen e saj.
Dion ka shpërndarë disa foto në llogarinë e saj personale në “Facebook” për të paralajmëruar të tjerët që të mos konsumojnë shumë pije energjike.
Në një prej fotove ajo shihet me tela që masin rrahjet e zemrës, ndërkohë që pranë ka një kuti të madhe, të cilën duhet ta mbajë gjithmonë me vete, nëse do që të mbetet gjallë.
Në një postim në “Facebook”, 18-vjeçarja shkroi: Ja çfarë ndodh kur e kaloni fëmijërinë duke pirë pije energjike. Tani jam katandisur kështu me tela e me këtë kuti që duhet t’i mbaj 24 orë. Para se të pini pije të lira energjike, mendoni njëherë se çfarë po i bëni trupit.”
Përshtati për “Shëndet+”: Blertina Koka/ Burimi: Daily Mail
