Kalimi nga librezat e shëndetit tek karta shëndetësore ka sjellë kaos në qendrat shëndetësore. Megjithëse kanë pasur afat një vit që të marrin kartën, dalja nga qarkullimi e librezave në fund të muajit ka bërë që shumë qytetarë të dynden nëpër qendrat shëndetësore, të cilat duket se nuk i kanë kushtet për të përballuar një fluks të tillë.
Në Qendrën Shëndetësore Nr.1 të Tiranës qytetarëve u duhet të presin për shumë orë në radhë për të tërhequr kartën e shëndetit. Kjo është kthyer në një shqetësim për ta, pasi shpesh u duhet të lënë ditën e punës për të pritur.
“Kam gjithë ditën që pres në radhë, – thotë një qytetar që po pret në radhë. – Për më tepër nuk më duket normale që më duhet ta rinovoj prapë pas tre muajsh. Libreza shëndetësore ishte më mirë, pasi ishte njëvjeçare”, thotë ai.
Siç mësohet, karta e shëndetit ka afat tremujor për të papunët dhe 6-mujor për të punësuarit.
Një tjetër qytetare, Jumira Brahaj, tregon se i është dashur të shkëputet nga puna dy ditë rresht për të siguruar kartën: “Kjo është dita e dytë që vij. Vetëm tani arrita të mbaroj punë. Ka radhë të tmerrshme, për të mos folur pastaj për ata që nuk e njohin radhën, sepse njohin mjekët. Informacioni është bërrnut, punonjësi është arrogant dhe nuk e bën fare punën e tij.”
E pyetur lidhur me fluksin infermierja S.E. (nuk preferon të identifikohet me emër) thotë: “Radha është për efekt kohe dhe për faktin se është një person që po përballon gjithë fluksin. Për më tepër, hera-herës ka pasur edhe probleme teknike dhe kështu shkaktohet kaos tek qytetarët në radhë”.
Edhe pse qytetarët janë ankuar shpesh për këtë kaos të krijuar në qendrat shëndetësore për kartat e shëndetit, si dhe afatin e tyre, ende nuk janë marrë masa për ta zgjidhur këtë problem./ Donjeta Zeqa
