Një risi që duket si e dalë nga filmat fantastiko–shkencorë po bëhet realitet në Kinë. Shkencëtarët atje po zhvillojnë robotin e parë humanoid në botë që mund të mbajë një fëmijë gjatë gjithë shtatzënisë dhe ta lindë atë.
Roboti do të pajiset me një mitër artificiale që furnizohet përmes një sistemi ushqyes, dhe pritet që prototipi i parë të prezantohet vitin e ardhshëm. Çmimi në treg parashikohet të jetë rreth 10 mijë paund.
Projektuesi i pajisjes, Dr. Zhang Qifeng, thekson se nuk do të jetë thjesht një inkubator, por një sistem që simulon gjithë procesin nga konceptimi deri në lindje. Ai shton se teknologjia është tashmë në fazë të avancuar dhe janë duke u zhvilluar bisedime edhe me autoritetet për çështjet etike dhe ligjore.
Reagimet në rrjetet sociale kanë qenë të forta dhe të ndara. Disa e konsiderojnë këtë zhvillim si joetik dhe çnjerëzor, ndërsa të tjerë e shohin si shpresë për çiftet që nuk mund të kenë fëmijë.
Ky projekt vjen në një kohë kur në Kinë infertiliteti është në rritje, dhe autoritetet po kërkojnë zgjidhje alternative për të përballuar këtë sfidë demografike.
