Vazhdojnë denoncimet që dëshmojnë për kushtet skandaloze të spitaleve dhe autoambulancave në vendin tonë, me të cilat duhet të punojnë mjekët. Pas denoncimit publik nga infermieri Frrok Bardhi, i cili tregoi për kushtet skandaloze të Urgjencës dhe autoambulancave në Tiranë, vjen një tjetër denoncim, këtë herë nga një politikan.
Kryebashkiaku i Rrogozhinës, Beqir Nuredini, ka treguar përmes disa fotove gjendjen e mjerueshme të autoambulancës në këtë qytet, e cila duhet t’u shërbejë rreth 100 mijë banorëve.
“Një barakë për ambulancë që do të duhej t’i shërbente 100.000 banorëve.
A ka turp më të madh se ky???
Të na rrojë Ministria e Shëndetësisë”, shkruan Nuredini në profilin e tij në Facebook, ndërsa e shoqëron edhe me fotot që i shikoni më poshtë.
Në një tjetër postim po në faqen e tij në Facebook ai shkruan se ka financuar nga të ardhurat e veta që të blihen 3 ambulanca të reja për qytetin e Rrogozhinës.
3 ambulancat që plotësojnë te gjitha standardet.
Vijnë për 45 ditë.
Po i financoj personalisht si edhe me ndihmën e biznesit!
Mesazhi është i qartë: me vullnet problemet zgjidhen.
Kur një individ mund ta zgjidhë, ministria sigurisht që mundet.Kush shqetësohet, të çojë të fala tek Ministria e Shëndetësisë.
