Përshtati në shqip për “Shendeti.com.al”: Marsela Aliaj
Fëmijët e lindur me kokë të madhe kanë më shumë gjasa të jenë të zgjuar dhe të kenë një të ardhme të suksesshme, sugjeron një studim i ri.
Studimi ka krijuar një lidhje midis madhësisë së kokës së një fëmije me arritjet akademike të tij në jetë, dhe ka dalë në përfundimin se sa më e madhe të jetë koka, aq më i zgjuar do të bëhet fëmija.
Këtë zbulim e bënë shkencëtarët që po studionin lidhjen midis gjeneve, koeficientit të inteligjencës dhe shëndetit mendor në përgjithësi.
“Përveç lidhjes midis gjenetikës, aftësive njohëse dhe disa prej aftësive fizike, si dhe shëndetit mendor në përgjithësi, studimi tregoi gjithashtu se aftësitë njohëse kanë një lidhje gjenetike me madhësinë e trurit, formën e trupit dhe arritjeve në arsim”, thotë profesori Ian Deary i Universitetit të Edinburgh.
Për këtë studim janë marrë të dhëna nga 100 mijë britanikë të moshave nga 37 në 73 vjeç.
Pjesëmarrësve iu kërkuan për analiza mostra gjaku, urine dhe pështyme, si dhe të siguronin informacione për mënyrën e jetesës.
Përfundimet treguan se fëmijët e lindur me kokë të madhe ishin në mënyrë të konsiderueshme më të prirur për të marrë një diplomë universiteti , si dhe të shënonin pikët më të larta në një numër të madh testesh që kërkonin arsyetim.
Ky studim identifikoi 17 gjene të rëndësishëm të cilët ndikonin në funksionimin e trurit dhe në shëndetin mendor dhe fizik.
Shkencëtarja Saskia Hagenaars shtoi: “Ky studim mbështet një ide ekzistuese, e cila thotë se personat me shëndet të përgjithshëm më të mirë kanë më shumë gjasa të kenë një nivel më të lartë inteligjence”.
Masa mesatare e kokës për fëmijët e porsalindur është 36 cm për djemtë dhe 35 cm për vajzat.
Burimi: Independent / https://shendeti.com.al/
