Një 26-vjeçar u arrestua ditën e mërkurë, pasi goditi me levë në kokë mjekun e spitalit të Laçit. Policia e Lezhës njoftoi arrestimin e Ergys Prelajt, banues në lagjen “Demokracia”, Mamurras, “pasi më datë 28.04.2015 ka goditur me mjet të fortë 
levë mjekun e spitalit të Laçit, shtetasin N.G, duke i shkaktuar dëmtime të lehta në dorë dhe kokë”.
Pas goditjes së mjekut, Prelaj është larguar në drejtim të Mamurrasit me mjetin e tij të cilin e drejtonte pa dëshmi. Po sipas policisë ky shtetas nuk i është bindur urdhrit të punonjesit të policisë për të ndaluar dhe është bllokuar në Thumanë.
Akuzat e ngritura ndaj tij janë: “goditjet për shkak të detyrës”, “mosbindje ndaj urdhrit të punonjësit të policisë së rendit publik” dhe “drejtim i automjeteve pa dëshmi”.
Mësohet se konflikti me mjekun ka nisur për arsye banale, pasi mjeku i ka kërkuar Prelajt që të hiqte xhupin dhe varësen për të bërë grafinë. Sipas policisë, Prelaj ka qenë i dënuar edhe më parë për vjedhje banesash në Itali./ Shëndet+
