Gjatë mbledhjes së sotme të Task-Forcës për masat e marra ndaj koronavirusit, Ministrja e Shëndetësisë Ogerta Manastirliu, pohoi se deri tani në vendin tonë janë testuar 18 raste të dyshuara me këtë virus, por kanë rezultuar negative.
Ministrja u shpreh më tej se se ka nisur sot shpërndarja e 1.2 milion maskave kirurgjikale për të gjitha strukturat spitalore ne vend.
“Deri më tani nuk ka asnjë rast të konfirmuar, janë testuar 18 persona, që rezultojnë negative.
Përveç mjeteve të mbrojtjes personale dhe stokut ekzistues, ka nisur puna për të shpërndarë 1.2 mln maska kirurgjikale në strukturat e parësorit dhe spitale. 1 mln $ janë rialokuar dhe janë shtesë në buxhetet e spitaleve për të patur stokun e mjaftueshëm për cdo skenar potencial,” u shpreh Manastirliu.
Drejtuesja e ISHP-së, Albana Fico, tha në fjalën e saj se:
“Po vijojmë me trajnimet, në të gjitha nivelet, që nga vete ISHP deri në qelizë. Vijuam dhe përfunduam me traumën, urgjencën. Vijojmë me përditësimin e materialit, dhe pajisjen e strukturave me mjetet mbrojtëse personale.”
Ndërsa Drejtori i Urgjencës në QSUT, Brataj, u shpreh:
“Pas filtrit të parë që janë pikat kufitare, i dytë është 127 ku vijojnë thirrjet, janë 7745 thirrje nga data 23 që është shfaqur,kemi 45 % rritje të numrit të thirrjeve, po ashtu edhe rritje të vizitave. “
