Ministri i shëndetësisë Ilir Beqaj nënshkroi dje marrëveshjen 2 vjeçare të bashkëpunimit midis Shqipërisë dhe Organizatës Botërore të Shëndetësisë (OBSH) në fushën e shëndetit publik. Marrëveshja e bashkëpunimit midis dy institucioneve është konkretizuar gjatë një vizite zyrtare pune mes ministrit Beqaj dhe drejtores së zyrës Rajonale të OBSH-së për Evropën Zsuzsana Jakab në Kopenhagen. Vizita e ministrit Beqaj vijoi më tutje edhe me disa takime të tjera me drejtues të lartë të Zyrës Rajonale të OBSH-së për Evropën ku u ra dakord që së bashku me OBSH-në të fillohet puna për hartimin e një politike kombëtare të shëndetit publik e cila duhet të bazohet në axhendën e OBSH-së për Rajonin e Evropës “Shëndet 2020” dhe në angzhimin e Qeverisë Shqiptare për të kaluar drejt mbulimit universal.
Strategjia e kësaj nisme të OBSH-së përqendrohet jo vetëm në promovimin e shëndetit dhe parandalimin e sëmundjeve (sidomos atyre jo-të transmetueshme) por edhe reduktimin e pabarazive dhe krijimin e mjediseve mbështetëse duke evidentuar rëndësinë që kanë gradientët social të shëndetit si një sfidë kyçe për veprim në të ardhmen.
Kjo është marrëveshja e 13-të e bashkëpunimit ndërmjet Shqipërisë dhe OBSH-së, që nga viti 1992, ndërkohë që vjen pas suksesit të bashkëpunimit të marrëveshjes së mëparshme, – u shpreh Beqaj.
Midis të tjerash, përfaqësuesit e OBSH-së ranë gjithashtu dakord për të ndihmuar Ministrinë e Shëndetësisë në hartimin e skemës së re të financimit të sistemit të kujdesit shëndetësor në vend, përfshirë këtu edhe asistencën teknike për përpilimin normal të treguesve të llogarive kombëtare të shëndetësisë.
“Një nga çështjet e tjera të bashkëpunimit të përfshira në marrëveshjen e re me OBSH-së është edhe ndihma për hartimin e strategjisë së informacionit shëndetësor dhe shtrirja e projekteve të inovacionit në sektorin e shëndetësisë dhe mbështetje për reformën në tregun farmaceutik,” tha Beqaj.
OBSH u angazhua gjithashtu për të ofruar mbështetje teknike dhe projekte për shkëmbimin e përvojave edhe në kujdesin për dy grup-sëmundjet që janë prioritare në programin e qeverisë, përkatësisht kardio-vaskulare dhe tumorale.
