Ka vetëm pak kohë që kompanitë private të sigurimeve kanë futur në treg produktin e pensioneve private dhe aktualisht mbi 10 mijë shqiptarë janë anëtarësuar në këto fonde.
Autoriteti i Mbikqyrjes Financiare publikoi pak kohë më parë Raportin për Zhvillimin e Tregut të Pensioneve Private Vullnetare për gjysmën e parë të vitit 2015. Duke iu referuar raportit, tregu i pensioneve është rritur me 19.98% krahasuar me të njëjtën periudhë të një viti më parë. Aktualisht tri shoqëri ofrojnë pensione private suplementare dhe 10,791 shqiptarë janë 
anëtarësuar në këto fonde kursimi, ndërsa portofoli i investimit në këto fonde pensionesh ka arritur në 724 milionë lekë. Në krahasim me gjysmën e parë të vitit 2014, tregu i pensioneve private suplementare ka pasur ecuri pozitive si në rritjen e investimeve ashtu edhe në numrin e anëtarëve.
Tregu udhëhiqet nga Shoqëria Administruese e Fondeve të Pensionit SIGAL LIFE UNIQA GROUP AUSTRIA, ku 47% e anëtarëve kanë zgjedhur SIGAL LIFE UNIQA për të investuar për pensionin e tyre shtesë.
Pavarësisht performancës pozitive në këtë gjysmë të parë të vitit, tregu i pensioneve në Shqipëri vijon të mbetet i vogël dhe me potencial të madh zhvillimi. Duhet pranuar që sistemi privat i pensioneve paraqitet si një domosdoshmëri e kohës dhe jo si një luks. Të investosh që në rini për vitet e pleqërisë, është zgjidhja më e zgjuar për të mos rënduar ekonomikisht fëmijët, apo në rastin më të keq për të mos përfunduar në shtëpinë e të moshuarve, pa kurrfarë përkujdesjeje.
Siç dihet skema shtetërore mendohet që e kreu mirë misionin e saj, por ishte shumë efektive kur kishim një popullsi të re ku shumë punonin e kontribuonin dhe pak përfitonin (paguaj pak e merr shumë). Por në kushte e mplakjes së popullsisë, ku këto raporte kanë ndryshuar dhe ku 1.2 veta kontribuojnë dhe 1 përfiton, edhe skema duhet ndryshuar. Për këtë arsye për vendet e zhvilluara pas viteve 1980 dhe për vendet në zhvillim pas viteve 1995 janë futur edhe skemat private. Pra skemat private diktohen nga nevoja e kalimit gradual nga sistemi i solidaritetit– paguaj për të tjerët, në sistemin e vetëkapitalizimit- paguaj për veten.
Avantazhet e Fondit Privat të Pensioneve:
a- Pensionin privat mund të përfitosh në kohën që ti dëshiron. Mosha e daljes në pension shteti është 67 vjeç për meshkujt dhe 60 për femrat, ndërsa moshën e daljes në pension me skemat private mund ta zgjedhësh vetë, duke e reduktuar deri në 5 vjet.
b- Në pensionin e shtetit individi paguan për të tjerët, ndërsa në pensionin privat paguan për veten.
c- Me pensionin e shtetit, nëse individi humb jetën, familjarët nuk i përfitojnë të ardhurat që kanë kontribuar ndër vite, ndërsa në pensionin privat edhe nëse i siguruari humb jetën, familjarët e tij marrin të gjithë shumën e kontribuar ndër vite në kompaninë e sigurimit.
d-Pensionet private zgjidhin kontradiktën e brezave, duke e bërë brezin e ri më të interesuar për tu siguruar e për të derdhur konribute.
e-Në skemën private e zgjidh vetë kohën e pensionit dhe shumën e tij.
f- Pensionet private ofrojnë përfitime shumë më të mëdha për të njëjtën masë kontributesh që paguhen edhe me skemën shtetërore.
g- Zgjidhin problemet e shtrembërimit të tregut të punës, si në rastin e evazionit të zi ashtu edhe të atij gri.
Këto janë disa nga arsyet, por jo vetëm,pse sot pensionet private po zhvillohen me ritme të larta në të gjithë vendet e botës, madje edhe në Kosovë e Maqedoni, duke u bërë gradualisht dominuese të sistemit.
