Meshkujt sterilë apo me probleme fertiliteti të shkaktuara nga anomali të spermës jetojnë më pak dhe kanë rrezik dyfish për të vdekur para kohe.
Studimi i publikuar në revistën “Human Reproduction” u krye nga Universiteti i Stanfordit. Studimi ka përfshirë 12 mijë burra në harkun kohor 10-vjeçar të cilët i janë drejtuar qendrës së sterilitetit pranë Spitalit të Stanfordit.
Cilësia e spermës së tyre është vëzhguar në bazë të parametrave të ndryshme dhe kërkuesit kanë ndjekur zhvillimin e çdo personi për rreth 8 vjet. Në vijimin e viteve kërkuesit kanë regjistruar gjithë vdekjet dhe i kanë krahasuar këto të dhëna me cilësinë e spermës për secilin dhe me praninë e anomalive të ndryshme. Nga studimi rezultoi se kush kishte një apo më shumë anomali të spermës kishte rrezik të shtuar për të vdekur në tetë vitet në vijim. Më të rrezikuar ishin ata që kishin defekte të spermatozoideve.
Mbeten ende për t’u kuptuar shkaqet dhe lidhjet mes anomalive të spermës dhe rrezikut të vdekjes. Mund të jetë gjenetike ose hormonale ose mund të ketë një lidhje me sëmundje të tjera si hipertensioni. Kërkuesit kanë nisur një studim të ri për të zbardhur këtë mister./ Përgatiti: Arlinda Gjypi
