Blertina Koka
Kemi lexuar shpesh mesazhe falënderuese ndaj bluzave të bardha, si nga personazhet publike ashtu edhe njerëz të thjeshtë, për punën e tyre humane në shpëtimin e jetëve të njerëzve.
Këtë herë nuk kemi thjesht një mesazh falënderues për ta, por një sërë mesazhesh të pikturuara bukur në disa faqe muri.
Mësuesja e Liceut Artistik “Jordan Misja”, Entela Kasemi Beati, i ka shprehur falënderimet stafit të Spitalit Rajonal të Durrësit, sepse i shëruan mamanë, në mënyrën më të bukur, atë të pikturës.
Entela ka postuar disa foto nga puna e saj dyditore, që i ka dhënë tashmë një pamje krejt tjetër Pavionit të Sëmundjeve të Brendshme.
Pavarësisht paragjykimeve, nisur edhe nga ngjarjet reale apo dhe legjenda urbane që kanë treguar për mungesë shërbimi profesional e për abuzime deri në raste ekstreme, profesioni i mjekut mbetet gjithmonë human. Dhe për këtë duhet t’i jemi falënderues dhe mirënjohës çdo profesionisti të shëndetësisë.
Lexoni mesazhin e plotë te mesueses:
Për shërimin e mamasë time si edhe për të gjithë pacientet e pavionit të sëmundjeve të brendshme (patologjisë) në Spitalin Rajonal të Durrësit dhuruam punën, me shumë dëshire unë, Michele Kasemi Beati (për gjyshen) dhe infermierja artiste e këtij pavioni Jona Gjoni, e palodhur ne ndihmesën e saj për të bërë më të bukuren për të gjithë.
Gjeta rrugën për të shprehur falënderimin në mënyrën time, për Spitalin Rajonal Durrës, për të mirën Ogerta Manastirliu, për ugjerncën këtij spitali, për ata që shëruan mamanë, Reparti i Patologjisë, grupi i punës së këtij ndryshimi, doktor Eduard Spahiu , mjekë të tjerë, kryeinfermierja Nora Bushi e sidomos infermieret në të gjithë ditët e shërimit të saj.
Jemi të qetë në shërimin e plotë të mamasë, e për këtë bëra të pamundurën të kënaq në vazhdimësi qytetin e lindjes, Durrësin.
Një gjë të bukur e ndaj me të gjithë.
Gjatë punës dyditore duke pikturuar kisha të gjithë repartin përreth që shijonin çdo shkrim, po në fund fjalia më e bukur në grup e pacientëve ishte:
“SA TË BUKUR NA E BËRE SHTËPINË!”
