Një ndërhyrje e rrallë dhe tepër e vështirë është kryer nga mjekët e Spitalit Rajonal të Shkodrës.
Kirurgët dr. Besmir Grizhja, dr. Lulëzim Lekaj, dr. Luan Bajri, me mbështetjen e gjithë stafit të kolegëve, raportohet se kanë kryer një intervent kirurgjikal vaskular (bypass femoro popliteal me graft PTFE 5mm) për një sëmundje shumë të rrallë.
Nga viti 1964 deri në 2008, në botë janë regjistruar 168 raste në total.
Pacientja kishte Arterie ischiadike persistente aneurizmatike të trombozuar, me ishemi të këmbës (në rrezik amputacioni). Falë këtij interventi, pacientes iu shpëtua këmba.
“Ndihemi krenar për këtë intervent të suksesshëm, për institucionin ku shërbejmë si dhe për profesionalizmin e mjekëve kirurgë e anestezistë me vlerësim të veçantë për neurologun dr. Genci Nurja”, u shprehën kirurgët pas operacionit.
Burimi: Agjencia Telegrafike Shqiptare
