Denisa Canameti, “Shëndet+”
“Jemi në Itali. Ornela ka bërë një seancë kimio. Nuk është shumë mirë, por më mirë nga sa dukej këto kohët e fundit. Nuk na kanë dhënë shumë shpresë, por as nuk na i kanë shuar ato. Po presim. Do të luftojmë deri në fund. Ende nuk kemi paguar asnjë gjë, nuk e dimë si do të shkojë në vazhdim”.
Denoncimi nga shoqata “Together for Life” i rastit të Ornela Dervishit
Ishte kjo telefonata që Mystret Dervishi ka bërë dje në redaksinë e “Shëndet+”. Kur shpresat thuajse ishin shuar, 23-vjeçarja Ornelë, duket se me bekimin e familjes dhe dashurinë e të fejuarit, ka vendosur ta sfidojë dhe të fitojë mbi sëmundjen.
Kështu, në kuadër të një investigimi në shërbimin e onkologjikut, shoqata “Together for Life” dhe gazeta “Shëndet+” ngritën alarmin për rastin e 23-vjeçares Ornela Dervishi. Vajza vuan nga kanceri i mushkërive dhe është në stadin IV të sëmundjes. Mungesa e medikamenteve dhe pamundësia për t’i blerë ato jashtë spitalit ishin faktorë që vinin seriozisht në pikëpyetje jetën e vajzës.
Në bashkëpunim me babanë e Ornelës, gazeta “Shëndet+” dhe shoqata “Together for Life” pasi investiguan mbi historinë e sëmundjes, pasi u njoh me kartelën e saj dhe pas një bisede të gjatë me mjekët, bënë publike problemet e spitalit onkologjik, blerjen e ilaçeve kontrabandë, si dhe denoncoi këto probleme përpara shërbimit të onkologjikut, duke thirrur gjithë mediat.
Babai i Ornelës bëri thirrje për ndihmë, teksa tregoi gjithë kalvarin e vuajtjeve të familjes së tij dhe përpjekjet për të shpëtuar të bijën 23-vjeçare.
Pas kësaj daljeje publike, Mysretit iu dha mundësia për të kërkuar ndihmë edhe në një nga emisionet më të ndjekur në mediat vizive “Pasdite në Top Channel”.
Ëndrra e Mysretit për ta dërguar vajzën jashtë vendit tashmë është bërë realitet. Ata kanë udhëtuar drejt Italisë, kanë nisur trajtimin dhe, të paktën, tani kanë shpresë.
(Rasti i Ornela Dervishit u publikua në gazetën “Shëndet+” në kuadër të projektit “Investigim i abuzimeve për të sëmurët me kancer”, zbatuar nga shoqata “Together for Life” dhe mbështetur nga Fondacioni Shoqëria e Hapur për Shqipërinë.)
