Prof. As. Dr. Iliriana Shehaj Ruka, mjeke dhe pedagoge, një ndër ekspertet më të mira të diagnostikës së sëmundjeve të brendshme është ndarë nga jeta.
Lajmi është bërë i ditur nga Universiteti i Mjekësisë në Tiranë, ku përmes një postimi in memoriam në rrjetet sociale, shkruan që Dr. Iliriana punoi plot pasion dhe me një përkushtim të admirueshëm si mjeke në Shërbimin e Hematologjisë, Spitali Nr. 1 që nga viti 1964 dhe si pedagoge e Fakultetit të Mjekësisë në lëndën e Propedeutikës, sot Semiologjia Klinike, që nga viti 1967.
In memoriam!
Ndahet nga jeta Prof. As. Dr. Iliriana Shehaj Ruka, mjeke dhe pedagoge, ikonë e idealizmit human dhe mjekësor, një ndër ekspertet më të mira të diagnostikës së sëmundjeve të brendshme.
Ajo punoi plot pasion dhe me një përkushtim të admirueshëm si mjeke në Shërbimin e Hematologjisë, Spitali Nr. 1 që nga viti 1964 dhe si pedagoge e Fakultetit të Mjekësisë në lëndën e Propedeutikës, sot Semiologjia Klinike, që nga viti 1967.
Për shkak të angazhimeve familjare jashtë shtetit, ajo shkëputet disa vjet për t’u rikthyer në vitin 1990 në Shërbimin e Hematologjisë, QSU “Nënë Tereza” dhe si pedagoge e njëkohësisht drejtuese e Katedrës së Semiologjisë Klinike deri me daljen në pension në vitin 2003. Ajo kontribuoi në edukimin e studenteve të Fakultetit të Mjekësisë si dhe formimin profesional të specializantëve në fushën e Hematologjisë dhe Sëmundjeve të Brendshme.
Prof. Iliriana ishtë modeli i mjekut, pedagogut, familjarit dhe simbol i mirësisë e qytetarisë, duke gëzuar respekt tek kolegët, studentët dhe pacientët. Ajo karakterizohej nga një disiplinë e fortë profesionale, përkushtim ndaj pacientëve dhe studentëve, por dallohej dhe për shpirtin e saj artistik. Prof. Iliriana është autore e disa teksteve dhe moduleve mësimore, me të cilët studentët e Fakultetit të Mjekësisë studiojnë ende.
Për këto cilësi Profesoresha jonë do kujtohet gjithmonë me respekt.
Me ikjen e saj familjarët humbën njeriun e tyre të dashur, kolegët humbën një mike dhe mentore të mirë.
U prehsh në paqe Prof. Iliriana!
Universiteti i Mjekësisë, Tiranë i shpreh ngushëllime të sinqerta familjes.
