Njerëzit me astmë, sëmundje pulmonare obstruktive kronike dhe kushte të tjera të mushkërive përballen me rreziqe edhe më të mëdha nga ndryshimet klimatike, sipas një raporti shkencor të botuar në Gazetën Evropiane të frymëmarrjes.
Raporti mbledh prova se si efektet e ndryshimeve klimatike, si valët e të nxehtit, zjarret, thatësira dhe përmbytjet, do të përkeqësojnë vështirësitë e frymëmarrjes për miliona njerëz në mbarë botën, veçanërisht foshnjat, fëmijët e vegjël dhe të moshuarit.
“Ndotja e ajrit tashmë po dëmton mushkëritë tona. Tani efektet e ndryshimeve klimatike po bëhen një kërcënim i rëndësishëm për pacientët me probleme të frymëmarrjes”, thekson profesoresha e Universitetit të Kopenhagës dhe Presidentja e Komitetit të Mjedisit dhe Shëndetit të Shoqatës Evropiane të Pulmologjisë, Zorana Jovanović Andersen, një nga autoret e studim.
Kufijtë aktualë në Bashkimin Evropian për cilësinë e ajrit janë shumë më të larta se ato të përcaktuara në udhëzimet për cilësinë e ajrit të Organizatës Botërore të Shëndetësisë (OBSH): 25 mikrogramë për metër kub për grimcat e imëta të pezulluara me diametër të vogël PM 2.5 dhe 40 mikrogramë për metër kub për dioksidin e azotit në BE, ndërsa udhëzimet e OBSH-së përcaktojnë 5 mikrogramë për metër kub për PM 2.5 dhe 10 mikrogramë për metër kub për dioksidin e azotit. Megjithatë, BE-ja aktualisht po rishikon Direktivën e Cilësisë së Ajrit.
Autorët bëjnë thirrje në emër të Shoqatës Evropiane të Pulmonologjisë, e cila përfaqëson më shumë se 30,000 pulmonologë nga 160 vende, Parlamenti Evropian dhe qeveritë në mbarë botën, për të reduktuar urgjentisht emetimet e gazeve serrë dhe për të zbutur efektet e ndryshimeve klimatike./Top Channel
