Edhe pse ka shumë vite larg fushës së blertë, ai ka mbetur po i njëjtë, luftarak, i pamposhtur, fjalëpak, krenar dhe i thjeshtë.
Artur Lekbello, legjenda e futbollit shqiptar në vitet ’80-90, po lufton prej disa vitesh nga një sëmundje e rrallë, që prek 1 në 1 milion njerëz.
“Shenjat e para janë paraqitur shumë vite më parë, pothuajse gjashtë vite më parë. Fatkeqësisht një nga neurokirurgët që më ndiqte më tha që mund të jetë një nga sëmundjet e rralla që qëllon një në 1 milion njerëz. Nuk ke dhimbje, por nervat nuk ushqejnë qelizat e muskujve dhe muskujt dalëngadalë tkurren dhe që çon në paralizë dhe jetëgjatësia shkon nga 2 deri në 4 vite më së shumti”, thotë për Top Channel, ish-futbollisti i Kombëtares.
Lekbello ka si armë ndaj sëmundjes vetëm përkrahjen e miqve grekë, apo shqiptarë dhe karakterin e tij, pasi një diagnozë e plotë për analiza specifike në klinika të huaja kushton rreth 10.000 euro, ndërsa pensioni i invalidit që merr është vetëm 420 euro, ndaj është surprizuar kur ka mësuar edhe sensibilizimin për rastin e tij që kanë treguar dy ekipet e Skënderbeut dhe Tiranës në ndeshjen midis tyre në qytetin e Korçës.
“I falenderoj shumë për nismën që kanë marrë, në radhë të parë Presidenti i klubit të Korçës, meqë ndeshja zhvillohet në Korçë. Faleminderit shumë për ndihmën!”, thotë ai.
“Zoti një fjalë të mirë që thotë për njeriun thotë të duam njëri-tjetrin”, shprehet ish-futbollisti.
Burimi: Top Channel
