Zv/Ministrja e Shëndetësisë, Mira Rakacolli në komunikimin e përditshëm me median tha se Ministria e Shëndetësisë dhe Mbrojtjes Sociale ka vendosur në dispozicion të spitaleve një fond shtesë për mjetet e mbrojtjes personale.
“Pas mbledhjes së djeshme të Komitetit të Ekspertëve, Ministria e Shëndetësisë ka vendosur rialokimin e një fondi shtesë prej 1 milion dollarë vetëm për shtimin e stokut të mjeteve të mbrojtjes personale në strukturat shëndetësore. Ministria e Shëndetësisë siguron se aktualisht, të gjitha strukturat spitalore kanë gjendje sasinë e nevojshme të mjeteve të mbrojtjes personale për këtë fazë në të cilën ndodhemi”, u shpreh Rakacolli.
“Janë testuar 13 raste të dyshuara tek udhëtarë që kanë histori udhëtimi me vendet e prekura nga koronavirusi i ri dhe rezulton deri në këto momente, se Shqipëria nuk ka asnjë rast të konfirmuar me COVID-19”, shtoi Zv/Ministrja.
Nga survejanca e përforcuar në pikat kufitare rezulton se janë kontrolluar dhe këshilluar 4800 udhëtarë që kanë një histori udhëtimi me vendet e prekura nga shpërthimi i koronavirusit, gjatë 24 orëve të fundit.
Ministria e Shëndetësisë dhe Mbrojtjes Sociale rekomandon qytetarët që vijnë nga rajonet e prekura, të vetëkarantinohen për një periudhë prej 14 ditësh.
Gjithashtu, nëse ata kanë shenjat e infeksionit viral, temperaturë, kollë dhe sidomos insuficencë respiratore (vështirësi në frymëmarrje), duhet të telefojnë 127 për të marrë udhëzimet e duhura se si të veprojnë.
Zv/Ministrja foli më tej për rastin 45-vjeçari nga Berati humbi jetën në Sanatorium.
“Pacienti ka humbur jetën si rezultat i një pneumonie që është konstatuar se ka qenë i prekur edhe nga gripi stinor. Nuk ka pasur asnjë lidhje me koronavirusin” u shpreh ajo.
