Elona Tereziu, shendeti.com.al
Parfume, rimela, antidjersa e ornamente kozmetike nga më të ndryshmet shiten e blihen në dhomat e pacientëve të Spitalit të Traumës në kryeqytet. Janë shitësit ambulantë, të cilët me lirshmëri të plotë trokasin çdo ditë në dhomat e pacientëve, duke i ofruar të blejnë nga produktet e tyre.
Ndonëse në të gjitha dhomat e pacientëve qëndron i shkruar mbi derë orari i vizitave, kushdo hyn e del, pa asnjë pengesë nga punonjësit e këtij spitali. Madje, teksa pyesim një nga infermieret për orarin e vizitave, shprehet me habi duke thënë se nuk ka orare, mund të futesh kur të duash. Ndërkohë që i kujtojmë se në derën e pacientëve qëndron e shkruar një rregullore për këtë çështje, ajo na thotë: “Lëre atë se janë vendosur kot, por po ashtu, po nuk të lanë, kap ndonjë mjek!”
Sipas rregullores, orari i vizitave në këtë spital është 11:00-12:00 dhe 17:00-18:00, si dhe nuk lejohet qëndrimi më tepër se një person në dhomë për pacient.
Por e kundërta ndodh. Në spitale vazhdojnë të hyjnë 7-8 persona për një pacient e po kështu edhe shitës ambulantë. Të gjithë këta sjellin një sërë mikrobesh me vete, teksa pacientët që pretendohet të jenë shtruar për t’u kuruar, përballen me mundësi tepër të mëdha për të marrë lloj-lloj infeksionesh. / https://shendeti.com.al/
