Blerina Bombaj, dietologe
Kalciumi është i nevojshëm në trup, ndër të tjera, për të ndërtuar kocka dhe dhëmbë të fortë. Gjithashtu, kalciumi luan rol të rëndësishëm në mpiksjen e gjakut, në funksionin normal të muskujve dhe nervave, si dhe në ritmin e duhur të rrahjeve të zemrës. Pjesa më e madhe e kalciumit gjendet në kockat tona.
Fëmija që rritet në barkun tuaj ka nevoja të mëdha për kalcium në mënyrë që të zhvillohet. Nëse ju nuk merrni sasinë e nevojshme të kalciumit nëpërmjet ushqimit ditor, trupi juaj do të vërë në dispozicion kalcium nga kockat tuaja, duke ju vënë në rrezik për humbje të masës suaj kockore dhe për shfaqje të osteoporozës. Osteoporoza shkakton hollim dramatik të kockave duke i bërë ato më të brishta dhe më lehtë të thyeshme.
Shtatzënia është një periudhë kritike për gruan për të konsumuar më shumë kalcium. Nëse ju nuk përmbushni nevojat ditore në kalcium, pasojat nuk do të jenë të dukshme menjëherë. Ato mund të shfaqen në vitet më vonë të jetës suaj, sidomos pranë fazës së menopauzës.
Këshillat e mëposhtme do t’ju ndihmojnë të merrni sasinë e nevojshme të kalciumit nëpërmjet ushqimit ditor (1000 – 1300mg/ditë):
Duke konsumuar të paktën 4 racione bulmet çdo ditë do t’ju sigurojë sasi të mjaftueshme kalciumi. Një racion bulmet = 1 gote qumesht, 200ml kos, 45gr djathë të fortë.
Burimet më të pasura të kalciumit përveç bulmetit janë: zarzavatet me ngjyrë jeshile të theksuar (brokoli, spinaqi), prodhimet e detit, peshku i vogël që konsumohet bashkë me halat, si sardelet e vogla, fasulet, bajamet dhe frutat e thara.
Vitamina D është e nevojshme për përthithjen e kalciumit nga organizmi. Vitaminën D trupi e prodhon nëpërmjet ekspozimit në rrezet e diellit.
Shembuj ushqimesh që përmbajnë së bashku 1200mg kalcium:
1 gotë qumësht + 1 kupë kos + 30gr djathë të bardhë + 1 sallatë me spinaq » 1200mg kalcium
