Përgjigjja nga mjeku Altin Cekodhima:
Shkaku më i zakonshëm është jashtëqitja e feçeve të mëdha e të forta. Kapsllëku dhe shtrëngimi gjatë defekimit mund t’i shkaktojë gjithashtu. Një shkak tjetër është inflamacioni i anusit dhe rektumit, sëmundjet inflamatore të zorrës (koliti ulçeroz, sëmundja Crohn etj).
Faktorë risku janë edhe diarreja, infeksionet, kanceri dhe trauma. Shembuj infeksionesh që mund të shkaktojnë fisura anale janë: tuberkulozi, sifilizi, gonorreja, infeksionet nga virusi herpes simplex, cytomegalovirus dhe HIV. Trauma mund të vijë nga ndërhyrjet kirurgjikale apo marrëdhëniet seksuale anale. Të moshuarit mund të kenë fisura anale pjesërisht për shkak të sforcimit gjatë defekimit për shkak të kapsllëkut ose furnizimit të dobët me gjak të kësaj zone. Fisurat anale janë gjithashtu të shpeshta tek gratë pas lindjes.
