Elona Tereziu / Shendeti.com.al
Në kohën ku temperaturat jashtë kanë arritur kulmin, pacientëve të Poliklinikës së specialiteteve Nr. 2 në kryeqytet u duhet të përballen më kushte tejet të vështira.
Në korridoret ‘’mbytës’’ që presin çdo ditë me qindra pacientë, në këmbë, të ulur, mes zënkave dhe ulërimave se kush e ka radhën i pari, mungon edhe sistemi i kondicionimit. Në të vetmin kat ku janë vendosur dy të tillë, është ai nr. 3 megjithëse njëri nuk ndizet asnjëherë, tjetri vetëm me raste.
Bashkim. H, një zotëri i moshuar që pret të kryej një vizitë tek alergologjia, tregon se ka më shumë se dy orë në radhë. I ulur në një nga stolat aty pranë, ai del herë pas here jashtë për t’u mbushur me frymë. ‘’Ne jemi të sëmurë. Unë mezi mbushem atje jashtë me frymë e jo më këtu mes 30-40 njerëzve, por çfarë të bëjmë, halli na ka sjellë këtu. I pyetur nëse mendon se duhet të ketë sistem kondicionimi na thotë ‘’Është kondicioneri atje në fund, por herë e ndezin e herë jo. Këtu duhet rregulluar sistemi referimit se nuk ka çfarë i bën një kondicioner gjithë këtyre pacienteve. Ne jemi 30-40 njerëz që po presim këtu’’.
Një tjetër zotëri, Besniku, emigrant i ardhur nga Greqia ka sjellë nënën për një vizitë tek reumatologjia, një nga repartet me problematike për sa i përket fluksit të pacientëve, shprehet tejet i indinjuar nga situata ‘’Përfundimisht Shqipëria nuk bëhet me këta njerëz. Kam më shumë se dy orë këtu që pres radhën. Njëri shtyn, tjetri ulërit, tjetri shan, ajri i ndotur, temperatura që shkojnë 40 gradë. Kështu shërohen pacientët, por s’kanë faj mjekët, fajin e ka a i ‘’madhi’’.
Një situatë e tillë paraqitet pothuajse në të gjitha qendrat shëndetësore të vendit, ku mungon sistemi i kondicionimit, por fluksi i lartë që pret kjo qendër çdo ditë e bën edhe më alarmante situatën. / https://shendeti.com.al/
