Përshtati në shqip për “Shendeti.com.al”: Blertina Koka
Punonjësit e zyrës duhet të ushtrohen të paktën një orë në ditë për të shmangur rrezikun që shkakton qëndrimi për një kohë të gjatë ulur, ka zbuluar një studim i rëndësishëm i Lancet.
Studimi i kryer tek më shumë se 1 milion të rritur ka zbuluar se, qëndrimi ulur për të paktën 8 orë në ditë mund të rrisë rrezikun e vdekjes së parakohshme me 60%.
Shkencëtarët thonë se mënyra e jetesës sedenatre (qëndrimit ulur për një kohë të gjatë) përbën rrezik për shëndetin po aq sa duhani, dhe është shkaktar më i madh i vdekjeve sesa obeziteti.
Ata këshillojnë individët që punojnë në zyra të ndryshojnë rutinën e tyre ditore dhe të bëjnë nga 5 minuta pushim çdo 1 orë, si dhe ushtrime fizike në kohën e drekës dhe mbrëmje.
Një orë në ditë ecje ose pedalim, e shpërndarë gjatë gjithë ditës, është e mjaftueshme për të shmangur rreziqet e 8 orëve qëndrim ulur në zyrë, thonë ata.
Autori kryesor i studimit, prof. Ulf Ekelund, nga Universiteti i Kembrixhit dhe Shkolla Norvegjeze e Shkencës së Sporteve, është shprehur: “Kemi zbuluar se të paktën një orë aktivitet fizik në ditë, për shembull ecja në këmbë ose biçikletë, eliminon lidhjen midis qëndrimit ulur dhe vdekjes”.
“Nuk është e nevojshme që të bëni sport apo të shkoni në palestër, mjafton të bëni një ecje të shpejtë, ndoshta në mëngjes, gjatë drekës ose në mbrëmje. Duhet të bëni aktivitet të patën një orë në ditë, duke e shpërndarë atë gjatë gjithë ditës”, rekomandon ai.
Hulumtuesit shkencorë thonë se mënyra e jetesës tipike e ditëve të sotme moderne, me qëndrimin para kompjuterit gjatë gjithë ditës, pasuar nga qëndrimi para televizorit në mbrëmje, po rrezikon rëndë shëndetin e njerëzve.
Burimi: Telegraph / https://shendeti.com.al/
